Konstituohet Kuvendi i Serbisë, Vuçiç paraqitet me shumicë dërrmuese
Në Serbi është bërë konstituimi i përbërjes së re të Kuvendit me deputetët e dalë nga zgjedhjet e 21 qershorit. Por dhjetëra njerëz protestuan para ndërtesës së Kuvendit, duke brohoritur se kjo legjislaturë nuk ka legjitimitet. Opozita i ka bojkotuar zgjedhjet, duke i lejuar partisë së Presidentit të Serbisë, Aleksandar Vuçiç, të rezultojë me një shumicë dërrmuese. Kritikët dhe grupet e të drejtave të njeriut e akuzojnë Presidentin Vuçiç për shkelje të demokracisë së Serbisë, duke ushtruar një ndikim të madh në institucionet shtetërore dhe mediat. Opozita e Bashkuar e Serbisë gjithashtu tha se që nga 3 gushti, Serbia “zyrtarisht nuk ka Parlament”, sepse 250 parlamentarët e rinj nuk u zgjodhën në mënyrë ligjore. Vuçiç ka mohuar në mënyrë të përsëritur ndërhyrjen në votime, duke thënë se kundërshtarët e tij kanë pak mbështetje popullore. Pas betimit të deputetëve, fillon afati prej 90 ditësh për formimin e qeverisë së re. Në zgjedhjet e fundit parlamentare në Serbi, lista e Presidentit serb, Aleksandar Vuçiç, ka fituar 188 deputetë nga gjithsej 250. Lista e Partisë Socialiste të Serbisë - Serbia e Bashkuar ka 32 deputetë dhe Lidhja
Patriotike Serbe ( SPAS) 11 deputetë. Katër parti të pakicave kanë siguruar ulëse në Kuvend. Lidhja e Hungarezëve të Vojvodinës ka fituar nëntë deputetë, Lista e Muamer Zukorliç do të ketë katër deputetë, ndërsa SDA e Sanxhakut dhe Alternativa Demokratike Shqiptare - Lugina e Bashkuar kanë nga tre deputetë secila.