BE: Në negociatat tona nuk ka vend për përfaqësues nga SHBA
Stano: I mirëpresim iniciativat nga SHBA, i kemi partnerë
Në negociatat që drejton Brukseli nuk do të ketë një karrige për ndonjë përfaqësues amerikan, siç kërkoi më përulje në SHBA një ditë më parë koordinatori i Kosovës për bisedimet me Serbinë, Skënder Hyseni.
Nga Bashkimi Europian u shprehën se SHBA- të janë partner i rëndësishëm dhe se kanë komunikim e synime të përbashkëta për rajonin e Ballkanit Perëndimor dhe dialogun Kosovë- Serbi. Por zyrtarët e BE- së lanë të kuptohet se nuk do të kenë një negociator amerikan në seancat e tyre. Që pas emërimit në pozitën e koordinatorit për dialogun me Serbinë, Skënder Hyseni ka takuar përfaqësues të lartë të BE- së, të cilët e kanë rifilluar dialogun e bllokuar për 20 muaj. Të hënën, në Uashington, ku u takua me Përfaqësuesin Special të SHBA- së për Ballkanin Perëndimor, Matthew Palmer, i deleguari i qeverisë së Kosovës ka kërkuar që edhe SHBA të jetë e pranishme e përhershme në tryezën e dialogun të Brukselit. Ai dje ka biseduar edhe me emisarin e Presidentit Trump për dialogun, Richard Grenell, i cili e siguroi se mbetet thellësisht i anagazhuar. Por, në Bruksel, zëdhënësi i BE- së, Peter Stano, tha se pjesëmarrësit e vetëm në tryezën e dialogut janë përfaqësuesit e Kosovës dhe Serbisë, të cilët priten nga Miroslav Lajçak dhe Joseph Borell.
“Rruga drejt Bashkimit Europian për Kosovën ( gjithashtu edhe për Serbinë) kalon përmes dialogut të lehtësuar nga BE. BE, si lehtësuese e dialogut, punon që nga viti 2011 me Beogradin dhe Prishtinën drejt një marrëveshjeje gjithëpërfshirëse për normalizim të raporteve. Pjesëmarrësit e dialogut janë përfaqësuesit e Kosovës dhe Serbisë dhe ata priten nga Përfaqësuesi i Lartë i BE- së, Joseph Borell, dhe Përfaqësuesi Special, Miroslav Lajçak”, ishte përgjigjja e Stanos në “Express”. Por, pasi sqaroi se kush drejton dhe kush ulet në tryezë, Stano tha se mirëpresin iniciativat në përkrahje të dialogut të lehtësuar nga Bashkimi Europian dhe thekson se për dialogun Kosovë- Serbi kanë bashkëpunim me partnerët nga Shtetet e Bashkuara të Amerikës dhe se Uashingtoni e Brukseli kanë të njëjtat qëllime për rajonin. “Kur bëhet fjalë për përfshirjen e palëve të treta në përpjekjet për të ndihmuar Kosovën dhe Serbinë për t’u pajtuar për një normalizim gjithëpërfshirës të raporteve të tyre, ne mirëpresim të gjithë iniciativat në mbështetje të dialogut të lehtësuar nga BE- ja. Për BE- në, SHBA- ja është një partner i rëndësishëm. Ne kemi të njëjtat synime për rajonin dhe mbështetja e SHBA- së që ofrohet për dialogun e lehtësuar nga BE është e mirëseardhur dhe ne komunikojmë me partnerët tonë nga SHBA gjithashtu edhe për këtë çështje”, ka sqaruar Stano.