NE GJITHE VENDIN Legalizimet, emrat e rinj që marrin tapinë
Hyn në fuqi vendimi i qeverisë, Kadastra ka dy muaj kohë që të bëjë regjistrimin e këtyre pasurive. Përfituesit në Tiranë dhe në rrethe
Zyrtarizohet lista e përfituesve të tapisë në Tiranë dhe rrethe.
Një ditë më parë është botuar në Fletoren Zyrtare vendimi i fundit i qeverisë "Për kompensimin financiar të pasurive të paluajtshme që preken nga ndërtimet e palegalizuara". Në këtë vendim, krahas pronarëve që do të marrin paratë e kompensimin për tokën që u është zënë nga ndërtimet pa leje, janë edhe emrat e qytetarëve që do të pajisen me dokument pronësie.
LEGALIZIMET Gazeta boton sot listën me 260 përfituesit, për të cilët do të nisin procedurat e regjistrimit dhe të pajisjes me tapi. "Drejtoritë Vendore të Agjencisë Shtetërore të Kadastrës: Vlorë, Tiranë Veri, Shkodër, Tiranë Jug, Lushnjë, Kamzë- Vorë, Elbasan,
Kukës, Kavajë, Tiranë Rurale 1, Durrës, Gjirokastër, Korçë, Lezhë, Fier, Sarandë, Zonat e Stimuluara, të kryejnë ndryshimet përkatëse për këto pasuri në regjistrat e pasurive të paluajtshme", thuhet në vendimin e qeverisë. Në ligjin e ri janë përcaktuar edhe afate konkrete për përmbylljen e procedurave të legalizimit. Kështu, do të duhen vetëm dy muaj për t'u pajisur me certifikatë pronësie dhe nëse do të ketë nga ata që duan ta mbyllin këtë praktikë më shpejt, mund ta bëjnë këtë përkundrejt një tarife shtesë. "ASHK- ja, brenda 60 ditëve nga përfundimi i procedurave të kualifikimit, ligjëson ndërtimin, duke respektuar dispozitat e legjislacionit në fuqi për regjimet pasurore martesore, sipas gjendjes së momentit të aplikimit për ligjësim. Poseduesi i ndërtimit pa leje ka të drejtë të kërkojë përfundimin e procedurave administrative brenda 30 ditëve nga paraqitja e kërkesës kundrejt pagesës së një tarife shërbimi shtesë", thuhet në nenin 18. PRONARËT E TRUALLIT
Nga ana tjetër, pronarët e shpronësuar për efekt të procesit legalizues do të marrin paratë e kompensimit. Vonesat e krijuara nga moslikuidimi i faturës nga ana e qytetarëve që janë në proces legalizimi nuk do të penalizojnë pronarët në marrjen e kompensimit. "Llogaritja e vlerës së kompensimit bëhet në bazë të çmimit të përcaktuar në hartën e vlerës së pronës, për llojin e pasurisë "truall". Kur mbi truallin e parcelës ndërtimore në pronësi të pronarit joposedues rëndon hipotekë, procedurat e ligjësimit dhe të miratimit të masës dhe vlerës së kompensimit financiar nuk pengohen", thuhet më tej në ligj. Për rastet me mbivendosje, vlera e kompensimit financiar vendoset në një llogari bankare të posaçme dhe vihet në dispozicion të subjektit që do të rezultojë përfitues nga vendimi gjyqësor i formës së prerë, i cili zgjidh mbivendosjen.