Nishani: Propozimet do të jenë resursi kryesor i administratës

Ish- Presidenti Bujar Nishani dhe aktualisht kryetar i Këshillit Kombëtar në PD, në një intervistë për gazetën “Panorama” ka treguar etapat që do të ndjekë komisioni, ku ai u emërua nga dy organet më të larta vendimmarrëse të PD- së, Kryesia dhe Këshilli Kombëtar. Nishani pranon që procesi është delikat, por ai shprehet se me kriteret e përcaktuara nga sekretari i përgjithshëm, procesi do të jetë objektiv dhe transparent. Muaji gusht, sipas Nishanit do të jetë i ngarkuar për komisionin, pasi do të bëjë seleksionimin paraprak të kandidatëve bazuar në disa kritere, ndërkohë në fund të këtij muaji, ata do të kenë hartuar një listë paraprake dhe do ta dërgojnë për votim sërish në bazë. Ish- Presidenti theksoi se kandidatët, të cilët janë propozuar në muajt qershor- korrik nga anëtarësia dhe nuk do të jenë në listën finale për deputetë dhe kryetarë bashkie, do të jenë resursi prioritar për atë që përbën administratën politike të qeverisë së ardhshme. “Nuk do të ketë një proces që nënkupton skualifikimin, por një listë e kualifikuar për t’u vlerësuar nga baza si kandidatë për deputetë dhe lista që mbetet, si resursi prioritar i administratës së lartë të qeverisjes së re. Ura që do të lidhë procesin shtetëror vendimmarrës me publikun është një mekanizëm me shumë hallka dhe do të ketë nevojë për resurse njerëzore me energji të reja, motivim politik e qytetar dhe të aftë të bëjnë të mundur qeverisjen e vendit dhe marrjen e shërbimeve qytetarëve. Grupi i deputetëve do të jetë veçse njëra prej këtyre hallkave”, tha Nishani në intervistën për gazetën “Panorama”.