Përplasja Presidencë- Kuvend për ligjin mbi përjashtimin e jahteve nga TVSH
Përplasja mes institucionit të Presidentit dhe Kuvendit në muajt e fundit nuk mbeti vetëm në kuadrin kushtetues dhe për ligje thellësisht politike, por edhe për nisma të qeverisë në fusha të ndryshme, siç është ajo në turizëm. Ishin dy ligje që Kuvendi i miratoi në fundin e muajit maj që tentonin të normonin rregulla të reja në fushën e turizmit dhe që nga Presidenti u kthyen, duke i konsideruar si klienteliste, por edhe të papajtueshëm me gjuhën shqipe. Dy ligjet në fjalë, “Për aktivitetet e turizmit detar” dhe ligji “Për një ndryshim në ligjin ‘ Për tatimin mbi vlerën e shtuar’”, u kthyen për rishqyrtim nga Meta në fillim të qershorit. Ligjin e ri të qeverisë, që përjashton nga TVSH- ja të gjithë blerësit e mjeteve lundruese si jahte, Meta e ktheu për rishqyrtim me argumentin kryesor, se kjo nismë krijon idenë e përjashtimit me natyre klienteliste. Ndërsa në argumentimet për kthimin e ligjit “Për aktivitetet e turizmit detar”, Presidenti Meta u ndal veçanërisht në formulimet e huaja që gjenden në këtë ligj. Presidenti theksonte që në ligj janë përdorur fjalë dhe shkronja që nuk janë shqip dhe kësisoj është një nismë ligjore që bie në kundërshtim me Kushtetutën. Por me gjithë këtë qëndrim të Presidentit dhe argumenteve që ai paraqiti, maxhoranca nuk u tërhoq në asnjë prej këtyre ligjeve, duke i rrëzuar dekretet me radhë në komisione dhe më pas në datë 18 qershor i rrëzoi edhe në seancë plenare, duke iu hapur rrugën e futjes në fuqi të të dyja ligjeve. Ky qëndrim i maxhorancës u konfirmua në Kuvend, edhe pse një ditë para votimit Presidenti kishte bërë thirrje që SPAK të hetonte procedurën e miratimit të këtyre ligjeve.