Dorian Teliti: Bujqësia, në ditët e saj më të vështira

Dorian Teliti, shefi i kabinetit në Partinë Demokratike, tha se bujqësia shqiptare është në ditët e saj më kritike për shkak të politikave të gabuara që ka ndërmarrë qeveria në vitet e fundit. Sipas Telitit, qeveria e ka reduktuar në maksimum mbështetjen ndaj fermerëve, të cilët tashmë janë në kushtet e mbijetesës, pasi nuk marrin as subvencione për produktet e tyre, por gjithashtu kanë edhe vështirësi të mëdha për gjetjen e tregut. “Bujqësia në ditët e saj më të vështira. Fermerët shqiptarë të braktisur dhe të harruar nga qeveria. Zero mbështetje për ta edhe në kohe pandemie. Ndonëse bujqësia përfaqëson 20% të ekonomisë shqiptare, ndonëse në këtë sektor operojnë mbi 350 mijë fermerë të vegjël e të mesëm, ndonëse ne këtë sektor janë të punësuar dhe të vetëpunësuar mbi 460 mijë persona, shpërfillja e qeverisë e ka dëmtuar ndjeshëm këtë sektor mjaft të rëndësishëm. Fermerët po ballafaqohen me kosto tejet të larta dhe të papërballueshme të prodhimit, kosto të rritura mesatarisht me 30% për pjesën dërrmuese të produkteve. Duan të punojnë fermerët shqiptarë, por qeveria nuk i subvencionon. U bënë 7 vjet që ato pak subvencione që jepen nuk i shkojnë drejtpërsëdrejti fermerit, për të nuk ka asnjë qindarkë, paratë janë vetëm për xhepat e një grushti grumbulluesish të lidhur me deputetët e zonave. Duan të punojnë fermerët shqiptarë, por përballen me çmimin më të lartë të karburantit në rajon për mekanikën bujqësore, ngrohjen e serave të tyre etj., çmim ky dy herë më i lartë se në Maqedoninë e Veriut. Duan të punojnë e të tregtojnë produktet e tyre fermerët shqiptare, por shpeshherë i hedhin në kanal, pasi përballen me konkurrencën e produkteve të importuara dhe subvencionuara fuqimisht nga vendet e rajonit ( vendet e origjinës). Duan të punojnë blegtorët vendës, por sot mezi arrijnë të tregtojnë gjysmën e sasisë së mishit krahasuar me vitin e kaluar, lidhur kjo edhe me mbylljen/ reduktimin e aktivitetit të hoteleve dhe restoranteve. Shqiptarët e duan punën, por edhe një dorë u duhet dhënë”, tha mes të tjerash Dorian Teliti në reagimin e tij.