Vasili: Borxhi i ka kaluar 90% të PPB, SPAK të nisë hetimet
Nënkryetari i Lëvizjes Socialiste për Integrim, Petrit Vasili, bëri dje thirrje për Prokurorinë e Posaçme Antikorrupision, që të nisë hetimet për një fshehje të mundshme të borxhit publik real. Përmes një postimi në rrjetet sociale, Vasili shkruan se borxhi real tashmë i ka kaluar 90% të PPB dhe se SPAK duhet të nisë hetimet dhe jo të arrestojë njerëz që tashmë kanë ndërruar jetë. “SPAK të dërgojë pas hekurave qeveritarët për krimin ekonomik kolosal të borxhit publik!! Çfarë presin më? Që katastrofa ekonomike të shkatërrojë gjithçka? A ka ndokush ndonjë dilemë se kjo qeveri mund të ndalë katastrofën? A ka dyshim ndonjë se qeveria vetëm rëndon e thellon ajo vetë krizën? A ka ndokush pikëpyetje se korrupsioni shkatërrimtar, koncesionet dhe pastrimi i parasë i kësaj qeverie na shtyn vetëm drejt greminës ekonomike? Sot, niveli i borxhit publik është në shifra të frikshme dhe rrënuese. Borxhi i ka kaluar me kohë 90% dhe ai nuk deklarohet, fshihet dhe shpërdorohet ne mënyrë kriminale nga qeveria dhe Kryeministri i rilindjes. Përgjegjësia për këtë situatë bie vetëm mbi qeverinë dhe Edi Ramën. Ç’pret SPAK që nuk lëviz për këtë krim ekonomik të përmasave kolosale, që përfaqëson borxhi publik dhe që mund të kolapsojë vendin brenda pak ditësh? Hetimi dhe nxjerrja e përgjegjësive penale për borxhin publik sot është mision kombëtar. SPAK nuk mund të fshihet më pas arrestimit të komisionarëve të vdekur, por duhet t’i kthehet detyrës, ndryshe shndërrohet në bashkëfajtor dhe do të ulet një ditë në bankën e të akuzuarve bashkë me ish- qeverinë rilindëse”, shkroi Vasili.