UDHËZIMI I RI
NENI 18 Përsëritja e provimit të kualifikimit
Kandidatët, për të gjitha kategoritë e kualifikimit profesional, që futen në procesin e kualifikimit, duke filluar nga ky vit, në rast se nuk e kalojnë me sukses provimin, e rijapin detyrimisht në sesionin pasardhës. Kandidatët që nuk paraqiten në provim ose nuk e përfundojnë, konsiderohen që nuk e kanë kaluar me sukses.
Kandidatët, në rast se nuk e marrin provimin dhe në sesionin pasardhës, pezullohen nga detyra deri në momentin e kalimit të provimit me sukses. Kandidatit i pezullohen efektet financiare në periudhën e pezullimit dhe vendi i punës shpallet përkohësisht i lirë.
NENI 21 Procedura e ankimit
Për portofolin: a) Kandidati ka të drejtë të ankohet me shkrim për vlerësimin te titullari i ZVAP- së brenda tri ditëve nga vlerësimi i portofolit. b) Titullari i dërgon ankuesit përgjigjen me shkrim brenda pesë ditëve nga data e dorëzimit të ankesës. c) Përgjigjja e titullarit është përfundimtare.
Për provimin: a) Kandidati ka të drejtë të ankohet me shkrim, brenda tri ditëve nga data e përfundimit të provimit te drejtori i QSHAsë, për parregullsi gjatë zhvillimit të provimit ose për ndëshkimet që i janë dhënë nga monitoruesi i QSHA- së. b) Drejtori i QSHA- së i dërgon ankuesit përgjigjen me shkrim brenda dhjetë ditëve nga data e dorëzimit të ankesës.
Për vlerësimin e testeve: a) Brenda tri ditëve nga data e njoftimit të rezultateve të provimeve, ZVAP- ja mbledh të gjitha ankimet me shkrim të kandidatëve për vlerësimin e provimit dhe i dërgon në formë elektronike dhe me postë në DRAP. b) Brenda tri ditëve nga marrja e ankimeve nga ZVAP- të, DRAP i mbledh të gjitha ankimet nga ZVAP- të përkatëse dhe i dërgon në QSHA në formë elektronike dhe me postë, sipas formatit të përcaktuar nga QSHA. c) Nëse ankesa e kandidatit gjykohet e drejtë, testi rivlerësohet. ç) Vendimi i Komisionit të Shqyrtimit të Testeve është përfundimtar. d) Përgjigjet e vlerësimeve përfundimtare të kandidatëve u dërgohen në formë elektronike DRAP- it dhe ZVAP- së përkatëse.