Rama: Arti shqiptar humbi një nga bijtë e vet më premtues

Ministrja Margariti: Ishe në kulm të krijimtarisë

Talenti i Arben Bajos, puna e tij e spikatur në skulpturë, në më shumë se 3 dekada karrierë kishte bërë për vete krahas komunitetit të artistëve, koleksionistëve, dashamirësve të thjeshtë, edhe politikanët njohës të artit e kulturës.

Kryeministri Edi Rama, përmes një statusi në rrjetet sociale, ka përçuar dje një mesazh ngushëllimi për humbjen e parakohshme fizike të artistit. “Çfarë trishtimi! Ben Bajo nuk do t’i hapë më sytë e as sytë e admiruesve të skulpturës nuk do të shohin më krijesa të duarve të tij! Ai nuk ia doli dot t’i mbijetojë virusit vdekjeprurës, që vazhdon të marrë jetë njerëzish nga kjo botë, duke sfiduar përparimin marramendës të shkencës e të mjekësisë, me kërcënimin e përsëritjes së kasaphanës së vitit 1918, kur gripi spanjoll gllabëroi dhjetëra miliona njerëz. Beni ishte ende shumë i ri dhe arti i tij ishte ende në zhvillimin e vrullshëm drejt njehsimit me vetë artistin, çka vetvetishëm reflektonte akoma influencën e disa mjeshtërve të mëdhenj, ndërkohë që shëmbëlltyrat e bronzta po merrnin dora- dorës hijen e pangatërrueshme të individualitetit të skulptorit të talentuar. Një humbje e madhe kjo për ata që e njohën djalin fisnik, duarartë e fjalëpakë, po edhe për artin bashkëkohor shqiptar po ashtu, që humbi sot një prej bijve të vet më premtues e më të përkushtuar. Eh, jeta është kjo, dihet gjithnjë si mbaron, po s’dihet asnjëherë kur mbaron rrugëtimi ynë në këtë botë, ku disa e kanë dhuntinë e fatin të lënë pas diçka që i mbijeton vdekjes, veprën e tyre. Artistët hyjnë te këta disa dhe kur janë prej vërteti, siç ishte Ben Bajo, kujtimi i tyre pavdekësohet nga prania pa kohë e veprave të tyre mes njerëzve që vijnë e shkojnë, në ndërkohën pa kufi që veprat mbeten. Ngushëllimet më të ndjera të dashurve e të afërmve të Benit, fjalët përballë vdekjes s’kanë asnjë fuqi, po asgjë tjetër veç fjalëve vdekja nuk lë për dëshmitarët e saj”, shkruan Kryeministri.

Miqtë e Bajos tregojnë se skulptori ka pasur edhe vlerësimin e institucioneve të kulturës për veprat që ai realizonte. Ministria e Kulturës, Elva Margariti, ka shprehur dje keqardhjen për ndarjen nga jeta të artistit, duke theksuar se përjetësinë ai e ka siguruar përmes krijimtarisë së tij. “Me shumë gjasë, në studio të ka mbetur një punë e papërfunduar. Ishe në kulmin e krijimtarisë tënde dhe është e pabesueshme që nuk do të kthehesh më aty... Një ditë kaq e trishtë sot! Kemi një artist më pak.. Arben Bajo, ky mjeshtër i skulpturës, i mprehtë, zbërthyes karakteresh.... u nda prej nesh. A mundet të themi lamtumirë kaq herët!? U prehsh në paqe! Kujtimi dhe vepra jote do të jetë gjithnjë mes nesh!”, shkruan Margariti.

Edhe kryetari i Bashkisë së Tiranës, Erion Veliaj, i prekur edhe vet nga Covid- 19, ka shkruar një mesazh ngushëllimi për artistin, duke përmendur artin elitar që ai krijoi dhe qytetarinë e rrallë që e veçonte. “Pas betejës me virusin e pabesë, Shqipëria humbi një nga skulptorët më të mirë, Akademia një nga profesorët më të përkushtuar, Tirana një nga qytetarët më fisnikë!

Ngushëllime familjes së Arben Bajos në ditën më të vështirë - kryelartë për një prind, partner e artist të rrallë”, shkruan Veliaj.