Champions, Tirana sfidon Dinamo Tbilisin
Gjeorgjianët në aktivitet dhe kryesim, luhet 3 ditë pas 100- vjetorit
Nëse dhurata për 100- vjetorin e themelimit të klubit u përmbush nga Tirana, tani është koha për festë.
E pikërisht tri ose katër ditë ( 18 ose 19 gusht) pas ditëlindjes së 100- të ( 15 gusht), kryeqytetasit kanë shansin për të kërkuar lavdinë. Dje, në shortin e hedhur në Nion të Zvicrës në selinë e UEFA- s, Tirana ka mësuar se kundërshtari për turin e parë të Ligës së Kampionëve do të jetë Dinamo Tbilisi.
CHAMPIONS- I Me rregullat e reja të UEFA- s, Tirana do ta diskutojë këtë tur kualifikues me ndeshje teke në Tbilisi të Gjeorgjisë. Kampionia në fuqi atje është rivali që në bazë të grupit të katërt që UEFA kishte ndarë paraprakisht, konsiderohet edhe më i lehti në raport me Astanan, Karabag dhe Makabi Tel Aviv. E ndërsa ky mund të konsiderohet një gjysmëlajm i mirë, e keqja e këtij shorti është jo vetëm forma thuajse e shkëlqyer e gjeorgjianëve në Europa Ligë vjet, por mbi të gjitha ajo aktuale. Vjet, Dinamo Tbilisi ia doli që të kalojë ekipe si Engordani dhe Gabala në turet 1 dhe 2 të Ligës së Europës dhe u eliminua nga Fejnordi në turin e tretë. Këtë herë, Dinamo Tbilisi është një nga ekipet më në formë pas 9 javësh në sezonin e ri që ka nisur, duke koleksionuar 18 nga 27 pikë të mundshme, pas 9 ndeshjesh.
EUROPA Tirana rikthehet të luajë në Europë, pasi 3 vite më parë u eliminua nga Makabi Tel Aviv në Europa Ligë, por kthimi në Champions ndodh pas më shumë se një dekade. Për 25 herë kampionët e vendit do të jetë një kërkim drejt lavdisë, duke marrë në konsideratë që është vetëm një 90- minutësh ku mund të ndodhë gjithçka. Në rast suksesi, Tiranën e pret ndeshja e turit të dytë dhe në të kundërt zbret në turin e dytë të Ligës së Europës. Me fitimin e titullit, Tirana ka flamurin e përfaqësimit të Shqipërisë në kompeticionin më të rëndësishëm për klube, gjithashtu edhe të të qenit lokomotivë e skuadrave shqiptare për zbatimin e një protokolli të rrallë dhe tejet strikt. Shembull suksesi? Tirana e ka një të tillë, pikërisht duke eliminuar Dinamo Tbilisin në vitin 2003, kur në portë ishte Egbo, i cili priti dy penallti.