Ahmetaj firmos paktin me Italinë, 95 milionë euro për tërmetin
90 milionë euro kredi e butë dhe 5 milionë grante. Fokusi në rindërtimin e objekteve publike dhe sektorin energjetik
Është firmosur dje marrëveshja mes qeverisë shqiptare dhe asaj italiane për të materializuar angazhimin e dhënë nga fqinji përtej Adriatikut, për të ndihmuar Shqipërinë me 95 milionë euro në kuadër të procesit të rindërtimit pas tërmetit të 26 nëntorit.
Marrëveshja u firmos nga ministri i Rindërtimit, Arben Ahmetaj, dhe ambasadori italian në vendin tonë, Fabricio Bucci. Firmosja e marrëveshjes ishte konkretizimi i dialogut të ngjeshur të javëve të fundit mes palës italiane dhe asaj shqiptare, çka bëri të mundur arritjen e një dakordësie të përbashkët lidhur me sektorët parësorë, ku edhe do të përqendrohet kontributi i konsiderueshëm italian, që kap shifrën prej 95 milionë eurosh, i ndarë ky në 5 milionë euro grante dhe 90 milionë euro kredi e bute. FOKUSI I INVESTIMIT
Sipas njoftimit zyrtar të shpërndarë për mediat, sektorët e parashikuar për ndërhyrje janë: rindërtimi i strukturave publike, infrastruktura e rrjetit energjetik, edukimi profesional dhe ekonomia detare. Sektorët e investimit përbëjnë një ndërthurje mes sektorëve novatorë dhe sektorëve me një traditë të konsoliduar tashmë dhe veprimtarisë së Agjencisë Italiane për Bashkëpunim në Shqipëri. Por, gjithashtu, këta sektorë pasqyrojnë një pjesë të madhe të përparësive të përcaktuara nga “Post Disaster Need Assessment” e hartuar në bashkëpunim mes qeverisë shqiptare, Bashkimit Europian, Kombeve të Bashkuara dhe Bankës Botërore, me synim mbështetjen e Shqipërisë si në procesin e rindërtimit, në kuptimin e plotë të fjalës, ashtu dhe në nxitjen e disa prej sektorëve strategjikë të ekonomisë.
AHMETAJ Gjatë fjalës së tij, ministri Ahmetaj tha se kjo ndihmë është tejet e çmuar, pasi fokusohet në disa sektorë shumë potencialë për ekonominë shqiptare. “Kredia e butë prej 90 milionë eurosh do të angazhohet: “Në sektorin e energjisë, për përmirësimin e mëtejshëm të linjave të transmetimit, në zhvillimin e ekonomisë së detit, për përmirësimin e infrastrukturës portuale dhe peshkimit, në rritjen e kapaciteteve për përballimin e fatkeqësive natyrore, me përmirësimin e flotës dhe fuqizimin e burimeve njerëzore të emergjencave civile, ku eksperienca e mirënjohur botërisht e Italisë dhe asistenca e vëllezërve italianë do të jenë një ndihmë e çmuar për Shqipërinë”.
AMBASADORI Ndërkohë, ambasadori italian, Fabricio Bucci, tha se kjo marrëveshje tregon mbi të gjitha marrëdhëniet e veçanta që ekzistojnë mes nesh jo vetëm si miq, por edhe si vëllezër. “Jam veçanërisht i lumtur që Emergjencat Civile dhe Disaster Risk Reduction ‘ DRR’, janë sektorë strategjikë, të cilët e renditën Italinë në vijën e parë që prej fazave të para pas tërmetit. Jam i bindur se profesionalizmi dhe përvoja e gjatë italiane në këto fusha, krahas faktit se Italia dhe Shqipëria karakterizohen nga të njëjtat problematika gjeologjike dhe mjedisore, do të jenë çelësi i suksesit të një veprimtarie mbështetëse të natyrshme. Rrugëtimi do të jetë i gjatë dhe i ngarkuar, por historia mes Shqipërisë dhe Italisë bazohet te miqësia dhe bashkëpunimi. Kam bindjen se së bashku dhe falë një angazhimi të ndërsjellë e të vazhdueshëm do të mund të arrijmë rezultate të shkëlqyera”, deklaroi ambasadori Bucci.