SPAK kërkon konfiskimin e 17 pasurive të ish- të dashurit të Viola Spiros
Ish- i dashuri i Viola Spiros është arrestuar në Itali për trafik të lëndëve narkotike. I sekuestrohet apartamenti në mes të Tiranës
Prokuroria e Posaçme kundër Korrupsionit dhe Krimit të Organizuar ka kërkuar të konfiskohen shtatëmbëdhjetë pasuri, që i përkasin Valentin Selajt dhe të afërmve të tij.
Sipas SPAK- ut, Valentin Selaj është protagonist në trafikun e lëndëve narkotike dhe anëtar i një grupi që trafikoi kokainë në Europë. Pasuritë që prokurorët mendojnë se burojnë nga droga janë sipërfaqe toke të konsiderueshme, shtëpia e prindërve të Selajt, të cilin media italiane e etiketoi si ‘ zoti i kokainës’, garazhe, automjete, njësi shërbimi dhe llogari bankare. Njëra nga pasuritë gjendet në bulevardin “Bajram Curri” në Tiranë dhe është një apartament që u ble nga Selaj gjatë vitit 2017, në vlerën e 220 mijë eurove. Në njoftimin zyrtar, SPAK përcjell bashkëpunimin me Prokurorinë holandeze që hetoi gjashtë shtetas, mes tyre edhe Selajn, për trafik, pastrim parash dhe organizatë kriminale. Të huajt vunë në dijeni prokurorët shqiptarë për dyshimet se një pjesë të fitimeve që burojnë nga trafiku i kokainës, Selaj i investoi në Shqipëri, sikurse edhe rezultoi nga hetimi pasuror i nisur dy vite më parë. Në një nga aksionet policore, Valentin Selajt dhe bashkëpunëtorëve të tij iu bllokuan 97 kilogramë kokainë dhe 16 kilogramë heroinë. Hetimi me disa prokurorë zbuloi se grupi përdorte linjën nga Amerika Latine, në portin e Amsterdamit e më tej ia shpërndante ngarkesat Anglisë dhe Italisë, ku gjatë një operacioni antidrogë Selaj ra në pranga së bashku me partnerët në krim. Valentin Selaj njihet edhe si ish- i dashuri i gazetares Viola Spiro. Kohën kur Selaj ra në pranga, ata ishin një lidhje dashurie bashkë.
HETIMET Sipas letërporosisë, nga hetimet e kryera në Holandë ka rezultuar se shtetasit Ilirjan Memia, Valentin Selaj, Florenc Guri, Erion Koleci, Ded Pjetri dhe Jorgo Wajtaszczyk, prej disa vitesh kanë aktivitet kriminal në fushën e trafikimit të lëndëve narkotike të llojit kokainë. Objekti i letërporosisë ka qenë kryerja e verifikimeve pasurore për këta shtetas dhe familjarët e tyre në Shqipëri, si dhe kryerja e verifikimeve dhe mbledhja e të dhënave që mund të çojnë drejt zbulimit të pasurive të këtyre shtetasve në shtete të tjera. Nga verifikimet e kryera ka rezultuar se shtetasi Valentin Selaj dhe personat e lidhur me të, Valentin Vasil SELAJ, Vasil Gjergj SELAJ, ( babai i Valentinit), Leze Kolë SELAJ, ( nëna e Valentinit) dhe Aleks Vasil SELAJ alias Ardian Vasil SELAJ, ( vëllai Valentinit) kanë në Shqipëri disa pasuri të paluajtshme dhe të luajtshme që janë banesa, troje, toka bujqësore, llogari bankare dhe mjete motorike. Mbështetur në faktet e lartpërmendura, aktivitetin e dyshuar kriminal të shtetasit Valentin Vasil Selaj në Holandë, mungesa e të ardhurave të ligjshme në Shqipëri dhe jashtë saj për shtetasit Vasil Selaj, Leze Selaj dhe Aleks Selaj, pasuritë e konsiderueshme të paluajtshme e të luajtshme dhe investime që kanë në pronësi këta shtetas, lindin dyshime të arsyeshme se këto pasuri kanë ardhur si produkt i aktivitetit kriminal.