Ekstradohet shqiptari i parë në Kanada, 2 vjet në kërkim
Kishte urdhërarrest se aksidentoi për vdekje me kamion një grua
Erjon Kashari, 39 vjeç, është shqiptari i parë që ekstradohet në Kanada nga Interpol Tirana, pas marrëveshjes për ekstradimet që është nënshkruar mes dy vendeve.
Ndaj tij ishte firmosur një urdhërarresti në vitin 2018, nga Gjykata British Columbia, pasi akuzohej për një aksident me pasojë vdekjen atje. Policia tha dje se si rezultat i bashkëpunimit të Interpol Tiranës me homologët, ditën e djeshme është bërë ekstradimi nga Shqipëria drejt Kanadasë, i shtetasit shqiptar Erjon Kashari, 39 vjeç. Ky shtetas ishte shpallur në kërkim ndërkombëtar nga autoritetet kanadeze të drejtësisë, bazuar në urdhërarrestin e datës 15.06.2018 të Gjykatës British Columbia, Kanada, si person nën hetim për veprën penale “Neglizhencë me pasojë vdekjen”, parashikuar nga Kodi Penal kanadez.
Në vitin 2014, në Richmond, Kanada, ky shtetas, duke drejtuar një automjet tip kamion, ka përplasur shtetasen C. M., e cila për pasojë ka gjetur vdekjen. Gjykata e
British Columbia, Kanada, më datë 25.06.2018 ka vendosur masën e sigurisë “Arrest në burg”, për shtetasin shqiptar Erjon Kashatri. Ky shtetas është arrestuar në vendin tonë më datë 17.07.2019, me qëllim ekstradimin drejt Kanadasë. Autoritetet gjyqësore shqiptare kanë dhënë miratimin për ekstradimin nga Republika e Shqipërisë në drejtim të Kanadasë të shtetasit Erjon Kashari, i cili iu dorëzua oficerëve të Policisë kanadeze në aeroportin “Nënë Tereza” Rinas. “Interpol Tirana vijon bashkëpunimin me homologët, për kapjen dhe ekstradimin e personave të shpallur në kërkim ndërkombëtar. Si rezultat i këtij bashkëpunimi, ditën e sotme, nga Interpol Tirana është bërë ekstradimi nga Republika e Shqipërisë drejt Kanadasë, i shtetasit shqiptar E. K., 39 vjeç. Ky shtetas ishte shpallur në kërkim ndërkombëtar nga autoritetet kanadeze të drejtësisë, bazuar në urdhërarrestin e datës 15.06.2018 të Gjykatës British Columbia, Kanada, si person nën hetim për veprën penale ‘ Neglizhencë me pasojë vdekjen’, parashikuar nga Kodi Penal kanadez”, tha zyrtarisht Policia e Shtetit.