Meta pret ekipin nga Italia: Solidaritet vëllazëror, s’do ta harrojmë kurrë
Presidenti Meta priti dje në një takim në ambientet e Presidencës ekipin e mjekëve dhe infermierëve të ardhur nga Italia për të trajnuar stafin mjekësor shqiptar në përballje me COVID- 19. Presidenti Meta, pasi u njoh me asistencën konkrete të ofruar prej tyre për stafet mjekësore të spitaleve COVID- 1, COVID- 2 dhe spitalin e Shkodrës, theksoi se shkëmbimi i eksperiencave dhe thellimi i mëtejshëm i bashkëpunimit dypalësh kundër pandemisë, kësaj sfide të përbashkët, është më se i domosdoshëm, me qëllim rikthimin sa më parë në normalitet. Ndërsa falënderoi ekipin e mjekëve dhe infermierëve italianë për ndihmën tepër të vlefshme dhe bujare të ofruar në këto momente të vështira, kreu i shtetit u shpreh se “shqiptarët nuk do t’i harrojnë kurrë sakrificat dhe këtë solidaritet vëllazëror, që e forcon edhe më shumë marrëdhënien e shkëlqyer midis dy vendeve e popujve tanë”. Ndërkohë, të hënën, Presidenti kërkoi nga qeveria që të përfshijë në skemën e mjekimit edhe trajtimin me plazmë, duke e cilësuar këtë të fundit efektive në trajtimin e të prekurve me COVID. “Nisur nga informacionet përgjithësisht pozitive lidhur me terapinë me plazmë hiperimune ( konvaleshente) dhe për shkak se aplikimi i saj ka rezultuar mjaft i dobishëm për pacientët me COVID- 19, inkurajoj të ecet sa më shpejt me këtë terapi, duke siguruar së pari të gjitha aparaturat që bëjnë të mundur aplikimin e saj. Në këtë situatë, është shumë e rëndësishme të kërkohet ndihmë nga Italia për asistimin me specialistë, si një vend me eksperiencë të spikatur për vënien në zbatim të këtij protokolli”, nënvijëzoi kreu i shtetit.