Nga më të pëlqyerit te të larguarit, kush janë 495 kandidatët e PD për zgjedhjet
“Do t’i japim fund monopoleve në tregun e ilaçeve, rimbursime me ilaçe për shtresat në nevojë”
Kryetari i opozitës, Lulzim Basha, është zotuar sot se Qeverisja e PD me anë të vendimeve të saj do të rikthejë barnat e sigurta dhe me cilësi të përballueshme për qytetarët.
Ai ka theksuar se do i jepet fund importit te barnave me origjinë të panjohur. Gjatë një takimi me përfaqësuesit e “Urdhrit të Farmacistëve të Shqipërisë”, Basha ka deklaruar se PD në pushtet do i japë fund dhe monopoleve në tregun e ilaçeve. “Në takimin me drejtuesit e Urdhrit të Farmacistëve të Shqipërisë, znj. Diana Toma dhe Z. Dëfrim Goma diskutuam me shqetësim situatën në tregun e barnave dhe trajtimin shpërfillës të qeverisë aktuale ndaj profesionit të farmacistit. Gjatë takimit u ngritën problematika të rëndësishme, me të cilat po përballet ky sektor i rëndësishëm, pasi aktualisht tregu farmaceutik nuk ka në qendër pacientin, por klientelizmin. Monopolizimi i tregut të barnave nga disa kompani farmaceutike afër qeverisë, ka çuar në dëmtim të konkurrencës së ndershme dhe cilësisë së shërbimit. Janë larguar kompani të njohura, në treg nuk gjenden shumë barna të patentës, por ato janë zëvendësuar me barna të një cilësie të dyshimtë”, thuhet në njoftimin e zyrës së shtypit të PD- së. Në këtë takim, kreu demokrat dhe përfaqësuesit e “Urdhrit të Farmacistëve të Shqipërisë” ndanë shqetësimin për tendencën për kapjen e shërbimit farmaceutik, duke bërë që farmacisti të jetë i punësuar i distributorit”. “Në këtë mënyrë, në qendër do të jenë interesat e biznesit dhe jo qytetarët, pasi farmacisti nuk do të ketë asnjë fuqi të refuzojë barnat jo cilësore dhe që shkojnë në dëm të pacientëve. Në një situatë ku mbizotëron korrupsioni i përhapur kudo, qytetari mbetet viktimë e interesave të biznesit të distributorit, çfarë do të thotë që barna të lira dhe me origjinë të dyshimtë shiten me çmime të larta dhe pa efekt në trajtimin e sëmundjeve”, thuhet në njoftim. Kreu demokrat premtoi masat që do të marrë, nëse ai vjen në pushtet pas 25 prillit 2021. “Garantova përfaqësuesit e “Urdhrit të Farmacistëve të Shqipërisë”, se për mua dhe Partinë Demokratike, në qendër do të jenë interesat e pacientëve. Do të marrin fund monopolet dhe në treg do të ketë barna cilësore, të sigurta dhe efikase, shërbim farmaceutik cilësor dhe të aksesueshëm nga të gjithë. Qeveria do të ndihmojë shrtesat në nevojë dhe pensionistët, që të mund të marrin ilaçet e nevojshme përmes rimbursimit, i cili nuk do të jetë në bazë të interesave të klientëve distributorë, por të jetës dhe shëndetit të qytetarëve. ‘ Urdhri i Farmacistëve’ do jetë partner i qeverisë në hartimin dhe miratimin e ligjit të ri të barnave dhe shërbimit farmaceutik, në bazë të eksperiencave më të mira të vendeve të zhvilluara”, thuhet në njoftimin e takimit të kreut të opozitës.