Meta: Tradhtarët s’do cenojnë dot veprën e heronjve
“Punësimi i të rinjve të jetë prioritet kryesor në këtë vend”
Presidenti Ilir Meta edhe të dielën e shoqëroi me një mesazh të fortë politik nga Shkodra. Një foto të bërë para monumentit të “5 Heronjve të Vigut” në Shkodër, ka folur për tradhtarë dhe gjakprishur. “Sa herë e vizitoj Shkodrën, nuk mund të mos ndalem tek monumenti i “5 Heronjve të Vigut” për t’u përulur me respekt e nderim të thellë para jetës e veprës së bijve më të shquar të saj të Lezhës dhe Mirditës, të cilët dhanë jetën për çlirimin e atdheut. Populli i Shkodrës dhe populli shqiptar nuk do t’i harrojë kurrë bijat dhe bijtë e saj më të mirë, të cilët sakrifikuan gjithçka për Shqipërinë e lirë, sovrane dhe demokratike. Tradhtarët dhe gjakprishurit kurrë nuk do t’ia dalin të cenojnë dinjitetin dhe veprën e heronjve dhe Dëshmorëve të Kombit, që ndriçon rrugën tonë drejt së ardhmes të sigurt europiane. I paharruar dhe i përjetshëm kujtimi i ‘ 5 Heronjve të Vigut’ dhe i të gjithë Dëshmorëve të Atdheut!”, shkruan Presidenti Meta në postimin e tij të shoqëruar me një foto. Deklarata vjen pas një të premteje të nxehtë replikash mes Presidentit dhe Kryeministrit Rama në lidhje me dekorimet e fundit që kreu i shtetit u ka bërë heronjve të luftës. “Edhe del thotë, unë jam me Margarita Tutulanin. Tani, mes Margaritës dhe Monikës ka një ndryshim të madh, shumë të madh. Nuk i kërkoj Monikës të bëhet si Margarita. Se larg qoftë pastaj do detyrohet që të dali kundër Ilirit. O Ilir, lëri të rënët në punën e tyre. Heronjve të popullit nuk u jepen dekorata të tjera se është dekorata më e lartë. E kështu siç e ka nisur, kam përshtypjen do t’i japi edhe Skënderbeut, do t’i japi Skënderbeut me urdhrin e Nënë Terezës. Ku do shkojë? Nuk la njeri pa dekoruar”, u shpreh Rama para asamblesë kombëtare të PS. Këtij provokimi, Presidenti Meta iu përgjigj ashpër. Përmes një statusi, kreu i shtetit iu përgjigj Ramës duke thënë se nuk po bën politikë për të marrë vota, por po respekton historinë e kombit. Meta shkruan se ka lindur në një shtëpi, e cila ka qenë spital për partizanët për Jugun e vendit. “O shakaxhinjtë e integrimit! Unë nuk bëj aktrime me historinë e kombit tim dhe familjes sime! As politikë për vota, o palaço dhe të paatdhe! Unë kam lindur në Çepan, 1000 metra mbi nivelin e detit dhe u jam shumë mirënjohës prindërve të mi. O ordinerë, shtëpia ku linda unë në 24 mars 1969 ishte spital partizan për Jugun e Shqipërisë. Në këtë shtëpi erdhën dhjetëra partizanë, pa këmbë e pa krahë. Në themelet e kësaj shtëpie edhe sot është gjaku i tyre. Unë isha ndër udhëheqësit e Lëvizjes Studentore, por kurrë nuk e vura në diskutim gjakun e tyre. Se gjaku nuk bëhet ujë, o hajdutë ordinerë! Jam Ilir Meta dhe përballë do të më keni gjithmonë!”, shkruan Presidenti. Kreu i shtetit ishte dje në Ishëm ku dha edhe disa mesazhe për të ardhmen e të rinjve. “Sot në Ishëm, në këtë vendbanim të lashtë Ilir, simbol të qëndresës dhe kala të pamposhtur të betejave për liri të Heroit tonë Kombëtar, Gjergj Kastrioti Skënderbeu, ku trashëgohen brez pas brezi vlerat më të spikatura atdhetare dhe kulturore. Ishmakët e duan lirinë dhe artin. Brezi i ri më shumë se të gjithë! Jemi krenarë për gjithçka që Ishmi përfaqëson në historinë e qytetërimit tonë. E rëndësishme të ruajmë trashëgiminë kulturore dhe historike, të mbrojmë mjedisin dhe të fuqizojmë më shumë ekonomikisht komunitetin, ku punësimi i të rinjve të jetë prioritet kryesor”, ishte mesazhi i presidentit Meta.