Mjeku Dasho: Shëndeti i shqiptarëve, në rrezik
Ashtu siç edhe pritej, me ardhjen e vjeshtës rriten edhe shifrat e të infektuarve nga koronavirusi. Eksperti i Shëndetit Publik, Erion Dasho, ka ngritur shqetësimin për nivelin e lartë të vdekshmërisë në vendin tonë. Përmes një statusi në rrjetet sociale, doktori ka sjellë në vëmendje të dhënat nga data 1 korrik deri më tani në Itali dhe Gjermani, ku shifrat e të infektuarve kanë njohur rritje, por niveli i vdekshmërisë mbetet i ulët. “Me ardhjen e stinës së vjeshtës, shumë vende europiane po përballohen me një rritje të re të numrit të rasteve me COVID. Por ç’po ndodh me vdekshmërinë? Nga periudha 1 shtator dhe deri tani, Gjermania ka pasur një vdekshmëri 0.46%, megjithëse ka numëruar mbi 60,000 raste COVID. Për të njëjtën periudhë, Italia ka pasur një vdekshmëri prej 0.81%. Për paralelizëm, vdekshmëria në Shqipëri ka qenë 2.25%, ose gati pesëfishi i Gjermanisë dhe trefishi i Italisë. Për më tepër, Gjermania dhe Italia janë dy vendet me popullsinë më të moshuar në Europë, ku dihet se mosha është faktori kryesor i riskut në rastin e COVID”, ka shkruar doktori, i cili ka apeluar për marrjen e masave të menjëhershme nga autoritetet, që, sipas tij, gjatë kohës së pandemisë s’kanë bërë gjë tjetër veçse propagandë. “Këto shifra duhen të shërbejnë si bazë për raportimet dhe analizat në Shqipëri dhe jo propaganda. Ato bëjnë thirrje për veprim të menjëhershëm dhe strategjik! Masat e paefektshme dhe hipokrite si ajo e mbajtjes së maskës në rrugë, kur maskat nuk mbahen në njësi tregtimi dhe transporti, duhet t’ua lënë vendin masave strategjike të drejtuara nga trinomi testo- gjurmo- trajto! Shëndeti i shqiptarëve është në rrezik dhe ata po e humbin jetën me ritme disafish më të larta se qytetarët e tjerë europianë”, mbyll postimin e tij Dasho.