Shansi i fundit për maturantët, tri ditë afat për të aplikuar

Në 19 tetor fituesit, vetëm gjashtë ditë për t’u regjistruar

Kjo javë shënon një shans të ri dhe të fundit për të rinjtë që ende nuk e kanë gjetur vendin në auditorë.

Portali i aplikimeve në universitete hapet sot për të pritur preferencat e mijëra kandidatëve për kuotat ende të lira në IAL- të publike e private. Ndërsa një javë më vonë, në 19 tetor, do të shpallen fituesit, nga portali “u- albania”. Brenda muajit pritet të mbyllen të gjitha procedurat e regjistrimeve për t’i hapur rrugë fillimvitit të ri akademik, më 2 nëntor.

APLIKIMET Në çdo vit që kalon, shifrat flasin për një ulje të numrit të të rinjve që dalin nga bankat e shkollës së mesme, e më pak akoma nga ata që u drejtohen universiteteve për të marrë një profesion. Nga afro 32 mijë maturantë, vetëm 22 mijë prej tyre aplikuan në raundin e parë. Kushtet pandemike lanë në Shqipëri mijëra të rinj që në rrethana të tjera do të hidhnin sytë gjetkë për shkollim. Mbi 15 mijë u regjistruan që në raundin e parë, shumica prej të cilëve me mesatare nga 8.5 deri në 10. Katër mijë të tjerë arritën të gjenin vendin që donin në pesë fazat e raundit të dytë. Tanimë gara zhvillohet për ato pak vende që kanë mbetur bosh në universitete. Pritshmëritë, sipas RASH ( Rrjetit Akademik Shqiptar), janë që IAL- ve t’u shtohen edhe katër mijë studentë të tjerë në konkurrimin ku marrin pjesë të rinjtë që nuk fituan dot në dy raundet e para, ata që u çregjistruan, si dhe të tjerë që iu bashkuan së fundmi garës përmes aplikimeve në fillim të tetorit. Në tabelën bashkëngjitur shkrimit janë të gjitha datat dhe afatet për të interesuarit. Këta të fundit duhet të kenë parasysh limitet e kuotave dhe afateve që ofron ky raund. Vetëm 72 orë mundësi për të aplikuar duke përzgjedhur dhjetë degët që do të donin të ndiqnin, si dhe gjashtë ditë afat ( tri faza 48- orëshe) për t’u regjistruar, fillimisht në portalin “u- albania”, ku publikohet renditja në kohë reale e më pas në sekretarinë mësimore të njësive kryesore, që janë fakultetet. Përpara aplikimit duhet të keni në konsideratë disa kritere. Së pari, në degën e përzgjedhur duhet të siguroheni që ka kuota të lira, të plotësohet kriteri i notës mesatare për degët që e kërkojnë.