Përplasje për mandatet e anëtarëve të KLP e KLGJ
Kuvendi shpall vakancat për të bërë zëvendësimin në shkurt 2021. KLP e KLGJ kundër, kërkojnë qëndrimin deri në dhjetor
Një histori e re përplasjesh duket se ka nisur në sistemin e drejtësisë. Këtë herë përplasja është mes Kuvendit dhe institucioneve të reja të drejtësisë, për mandatet e anëtarëve të këtyre organeve që vijnë nga jashtë radhëve të sistemit gjyqësor.
Përmes dy letrave të publikuara në faqen zyrtare, Kuvendi ka shpallur vakancat për dy vende në Këshillin e Lartë të Prokurorisë dhe dy vende në Këshillin e Lartë Gjyqësor. Në letrën e firmosur nga sekretari i përgjithshëm i këtij institucioni Genci Gjonçaj, vakancat në Këshillin e Lartë të Prokurorisë janë ato të Gent Ibrahimit dhe Sandër Becit, ndërsa vakancat në Këshillin e Lartë Gjyqësor janë ato të Maksim Qokut dhe Erjon Muharremajt. Këta anëtarë janë zgjedhur nga Kuvendi me një mandat 3vjeçar dhe votimi në Kuvend është bërë në shkurt të vitit 2018. Nisur nga ky fakt për Kuvendin, mandati 3- vjeçar i anëtarëve të këtyre organeve të reja të drejtësisë përfundon në momentin kur janë votuar në Parlament. Në këto kushte në dy shpalljet e vakancave për në KLGJ dhe KLP, Kuvendi fton të gjithë juristët dhe pedagogët nga fakultet juridike dhe të shkollës së magjistraturës që përmbushin kriteret e kërkuara, që të dërgojnë aplikimet e tyre për t’u bërë pjesë e KLGJ- së dhe KLP- së. Por, përtej votimit në shkurtin e vitit 2018- të, Këshilli i Lartë Gjyqësor dhe Këshilli i Lartë i Prokurorisë e nisën zyrtarisht punën e tyre vetëm në dhjetorin e atij viti. Ky fakt ka bërë që KLP- ja dhe KLGJ- ja ta konsiderojnë fillimin e mandatit të tyre muajin dhjetor të 2018, çka do të thotë se edhe zëvendësimi do duhet të bëhet në dhjetor 2021 dhe jo në shkurt. Dy institucionet u mblodhën ditën e djeshme për të diskutuar mbi llogaritjen e mandatit tre- vjeçar të anëtarëve të tyre. Tashmë mbetet për t’u parë se cili do të merret për bazë si data e fillimit të mandatit për anëtarët e KLP- së dhe KLGJsë, data kur ata janë votuar nga Kuvendi, apo data kur institucionet janë konstituar dhe kanë nisur zyrtarisht punën.