Rama e Basha, “sherr” për lapsuset në deklarata
Kryeministri Edi Rama dhe kryedemokrati Lulzim Bahsa dolën dje para gazetarëve për të folur njëri për premtimet elektorale dhe tjetri për shqetësimet në shëndetësi. Por pavarësisht këtyre dy temave të rëndësishme, përplasja mes kryeministrit Rama dhe kreut të opozitës Basha erdhi për një lapsus të kreut të opozitës dy ditë më parë. Të hënën Kryeministri u pyet na gazetarët në lidhej me paketën me 5 pika që ka prezantuar PD për rimëkëmbjen e ekonomisë, por kreu i qeverisë tha se nuk kishte dëgjuar për këtë paketë. Një ditë më pas ditën e martë, gjatë një konference për mediat, kryedemokrati, gjatë fjalës së tij, bëri një lapsus. Gabimi u kap më pas nga Kryeministri Rama madje edhe u komentua. Ndërsa dhe në konferencën e radhës, Basha tha se Kryeministri gënjeu të hënën kur tha se nuk kishte dëgjuar në lidhje me paketën, pasi Basha i kujtoi Kryeministrit komentin e tij mbi lapsusin e bërë gjatë konferencës. “E kishte ndjekur konferencën tonë përshembull dhe ishte marrë me lapsusin tim. Herë tjetër kur të bëj lapsus do ta nxjerr unë i pari që të mos ketë kohë të merret me këtë, por të bëjë detyrën për të cilën është akoma aty. Nuk ka rëndësi nëse bëj një apo dy lapsuse në 4 vjet unë. Ato lapsuset e mia nuk i kushtojnë asgjë shqiptarëve, asnjë lekë, asnjë qindarkë. Ajo që u kushton shqiptarëve është e vërteta”, tha dje Basha. Po ditën e djeshme edhe Kryeministri Rama doli në një konferencë të fokusuar tek ekonomia dhe lidhur me akuzën e Bashës, u shpreh: “Kam parë siç kanë parë të gjithë atë që nuk është lapsus, por është trendit kur vjen puna te shifrat. Aty jemi në kushtet e komedisë dhe jo në kushtet e bisedës seriozë. Nuk kam parë asgjë”, tha Kryeministri. Ndërkohë nuk mungoi edhe reagimi i kryedemokratit, i cili e quajti banal kreun e qeverisë dhe e akuzoi se kërkon të devijojë vëmendjen nga problemi. “Kur vjedhja galopante, keqqeverisja, ekonomia dhe shëndetësia janë sot drama e çdo shqiptari, KM- ja fshihet si ‘ struci’ pas një lapsusi. Tragjike dhe me pasoja është të kesh një KM që nuk do ta t’ia dijë për 6 në 10 biznese drejt mbylljes e 100 mijë shqiptarë që kanë humbur punën”, shkroi Basha në “twitter”.