Naftëtarët, Basha: Rama ka 7 vite që po i gënjen
Në ditën e 16 të grevës së tyre revolta e naftëtarëve precipitoi në tentativë për të hyrë në ambientet e rafinerisë. Gjatë protestës ata u përballën me rojat private dhe ndërkohë thërrisnin “uzina është e jona”. Kërkesat e tyre janë të thjeshta. Ata kërkojnë që të marrin pagat e prapambetura dhe të rinis punën rafineria. Për këtë i kanë bërë thirrje edhe Kryeministrit Rama. Ky i fundit në një konferencë ditën e djeshme tha se nëse grevën e bëjnë për të sensibilizuar atë ajo është e panevojshme. Kreu i qeverisë tha se po bën përpjekje për ta zgjidhur por në mes duhet një dorë e fortë e privatit. “Po bëj gjithçka për të gjetur një zgjidhje, por nuk e kemi gjetur. Nuk kemi mundësinë të gjejmë një zgjidhje, nëse nuk kemi një fuqi që e merr përsipër nga ana private. Është një marrëdhënie private. Të gjitha çfarë kemi bërë kanë qenë përpjekje ekstra për të ndihmuar ata njerëz”, tha Rama. Por ndryshe nga Kryeministri Rama, Basha shprehet se situata ka precipituar në atë fazë për shkak të korrupsionit të kreut të qeverisë me miqtë e tij të naftës. “Ka dy vite që i gënjen dhe i mashtron. I ka mashtruar para dy vitesh me videokonferencë dhe ka dy vjet që nuk bën asgjë nga ato që ka premtuar. Dhe paratë që iu ka vjedhur bashkë me mafien e naftës, t’ua kthejë urgjentisht këto 16 rroga të prapambetura, sikundër të sigurojë që deri të paktën sa të dorëzojë çelësat e pushtetit, për sa kohë që naftëtarët dhe qytetarët kanë akoma fatkeqësinë që ta kenë në atë vend ku është akoma, të mos vërë dorë mbi pasurinë e tyre”, tha Basha.