“Ndryshimet në Kod cenojnë Kushtetutën e të drejtat e njeriut”
KSHH: Kryetarët e partive në 4 qarqe, kundër parimit të barazisë
Kundër ndryshimeve të Kodit Zgjedhor që u miratuan nga Kuvendi në 5 tetor ka dalë edhe Komiteti Shqiptar i Helsinkit. Përmes një deklarate të shpërndarë për mediat, KSHH- ja deklaron se dhënia e mundësisë vetëm për kryetarët e partive që të kandidojnë në 4 zona zgjedhore të ndryshme shkon kundër parimit të barazisë në Konventën Europiane të të Drejtave të Njeriut dhe bie ndesh me Kushtetutën shqiptare. Komiteti Shqiptar i Helsinkit ( KSHH) është i ndërgjegjshëm se në veprimtarinë parlamentare, kur është rasti, konsensusi dhe kompromisi janë të rekomandueshme dhe të nevojshme, por gjithmonë në përputhje dhe pa cenuar Kushtetutën dhe standardet ndërkombëtare. “KSHH mendon se shtesa e mësipërme që i është bërë nenit 67 të Kodit Zgjedhor bie ndesh me parimet e barazisë dhe të mosdiskriminimit që parashikon neni 18 i Kushtetutës sonë dhe neni 14 i Konventës Europiane të të Drejtave të Njeriut ( KEDNJ- së). Rregulli që sanksionohet në ligj se kandidati për deputet mund të regjistrohet vetëm në një zonë zgjedhore, është i drejtë dhe i ligjshëm, por përjashtimi për kryetarët e partive është kompromis që bie ndesh me parimet e përmendura më lart. KSHH- ja mendon gjithashtu se një kompromis i tillë ka qenë tepër i nxituar sepse është anashkaluar trajtimi i këtij problemi në Raportin e OSBE/ ODHIR- it të 14 shtatorit 2009 lidhur me zgjedhjet parlamentare të 28 qershorit 2009. Në këtë raport, midis të tjerave thuhet se Kodi Zgjedhor ( është fjala për Kodin e ri Zgjedhor të miratuar në Dhjetor 2008) vazhdon të ketë dispozita të paqarta dhe të mjegullta. Në këtë vështrim, përmendet në mënyrë të veçantë neni 67, paragrafi 3 i Kodit Zgjedhor që i lejon krerët e partive politike të kandidojnë në aq zona sa dëshirojnë. Kjo që thuhet në raport, bie ndesh me parimet e barazisë dhe ato të mosdiskriminimit. Në referenca përmenden: neni 26 i Konventës Ndërkombëtare mbi të Drejtat Civile dhe Politike, neni 7 i Deklaratës Universale të të Drejtave të Njeriut, Protokolli 12 i KEsë për mbrojtjen e të Drejtave të Njeriut dhe Lirive Themelore, paragrafi 76 i Dokumentit të Kopenhagenit të OSBE- së ( faqja 6 e raportit). Përjashtime nuk ka arsye të bëhen: Kryetari i Partisë apo i partisë udhëheqëse të koalicionit i regjistruar në listën shumë emërorë ka të njëjtin status ligjor: atë të kandidatit si dhe kandidatët e tjerë”, thuhet ndër të tjera në deklaratën e KSHH- së.