“Nëse doja të hakmerresha, do ta bëja 14 vite më parë”
Myslim Estrefi s’pranon vrasjen e kushëririt të tij në Romanat të Durrësit
Myslim Estrefi, i cili mesditën e së shtunës së shkuar përplasi me makinë për vdekje kushëririn e tij, Shaqir Estrefi, ka hedhur poshtë pretendimet e organit të akuzës për aksident të qëllimshëm për shkaqe hakmarrjeje. 41- vjeçari e ka konsideruar aksident për shkak të konsumit të alkoolit. “Është e vërtetë që mes baballarëve tanë ka pasur një konflikt, konkretisht në vitin 2006. Baballarët tanë ishin kushërinj me njëri- tjetrin dhe në një moment u përleshën fizikisht. Kur babai im tentoi t’i rrëmbente nga dora armën e zjarrit, Qamil Estrefi e qëlloi. Për këtë, Qamili u dënua. Që prej asaj kohe nuk kemi pasur asnjë përplasje, pasi në fund të fundit jemi tanët. Unë nuk e pranoj akuzën, pasi nuk është aksident i qëllimshëm me dashje për shkaqe hakmarrjeje, por aksident i shkaktuar në kushte të pavetëdijes, si pasojë e konsumimit të një sasie të madhe alkooli. Unë kam qenë në gjendje të dehur dhe Shaqirin e kam përplasur pa dashje. Nëse do të kisha për qëllim të hakmerresha, mund ta kisha bërë në momentet e para të ngjarjes, ose kur Qamili doli nga burgu. Asokohe isha djalë i ri, edhe mund të kisha gabuar, por jo sot që kam katër fëmijë”, kështu është shprehur Myslim Estrefi.
MASA E SIGURISË Gjykata e Durrësit ka dhënë masën e sigurisë “Arrest me burg” për 41vjeçarin Myslim Estrefi, i cili akuzohet se përplasi me makinë për vdekje kushëririn e tij. Prokurorja Anila Bebeçi ka kërkuar “Arrest me burg” për Myslimin, gjë që është pranuar nga gjyqtarja e seancës, Besjana Garxenaj, e cila e konsideroi të ligjshëm arrestimin e 41- vjeçarit. Nga ana tjetër, avokati i Istrefit, Ilia Ilia, bazuar edhe në dëshminë e të akuzuarit, ka deklaruar se nuk ka asnjë provë që ta implikojë Myslim Istrefin në aksident të qëllimtë për shkaqe hakmarrjeje. Sipas tij, kemi të bëjmë me një aksident të pastër shkaktuar në kushte të drejtimit të automjetit në gjendje të dehur nga Estrefi. L. M