Mësuesit, si përllogaritet pagesa për orët shtesë
Tri modelet e kompensimit financiar për orët suplementare, bazuar në kohëzgjatjen e mësimit: 25, 30 dhe 45 minutëshe
Me hedhjen e pagës së parë në këtë vit të pazakontë që mbajti më gjatë mësuesit në klasa, kanë lindur pretendimet e para për pagesën e orëve mbi normë.
Duke qenë se jo të gjithë janë mësues matematike dhe zërat kritikë për abuzime me mësuesit nuk janë pak, Ministria e Arsimit ka vendosur të bëjë transparencë duke publikuar tri modelet e përllogaritjes së pagesave bazuar në tri mënyrat e mësimdhënies në bazë të minutazhit të orëve: 45 minutëshe, 30 dhe 25 minutëshe. Nga 28 mijë arsimtarë në të gjitha shkollat e vendit, rezulton se gjysma e tyre kanë qëndruar në shkollë më shumë se sa norma javore.
MODELET Ndarja e klasave në dy grupe për shkak të pandemisë ka rritur ngarkesën e mësuesve si asnjëherë tjetër. Veç kushteve të vështira të mësimdhënies, me maska gjithë kohës, pa ujë e ushqim, mësuesit kanë zhvilluar mësim mesatarisht një orë në ditë çdo ditë, krahasuar me vitet e kaluara. Por, edhe pse mësuesit detyrohen të përmbledhin brenda orës së shkurtuar të mësimit( 25 apo 30 minutëshe) të gjitha konceptet që do të zhvilloheshin në një orë normale, ministria nuk vë shenjën e barazimit midis tyre. Matematika është e thjeshtë. Pra, një orë 45 minutëshe nuk është e barabartë me atë 25 apo 30 minuta. Rrjedhimisht, një shumatore e orëve normale shkon 900 në javë, ndërsa të shkurtuarave 1200, që përkthehen në shtatë orë shtesë. Asnjë minutë më shumë. E njëjta gjë funksionon edhe me modelet e tjera, sipas tabelës bashkëngjitur shkrimit. Ministria numëron rreth 14 mijë mësues të paguar për deri në shtatë orë suplementare, shuma e të cilave në një muaj kap shifrat e 8500 lekëve, pasi një e tillë paguhet nga 8 deri në 9 mijë lekë, sipas ministrisë. Por, sindikatat thonë se përfitimi është gati tre herë më pak, 250 lekë/ orë. Të njëjtën gjë thotë edhe udhëzimi i firmosur në 2016- ën, nga ishministri i Financave, Arben Ahmetaj, nr. 4, datë 13.12.2016 “Për formën, elementët dhe plotësimin e borderosë së pagave për njësitë e qeverisjes së përgjithshme”. Në kolonën për shtesën e pagës për orët mësimore mbi normë citohet: “Punonjësit mësimorë efektivë të arsimit parauniversitar, që për nevoja të procesit mësimor japin orë mbi normën mësimore, të lejuar me dispozita, paguhen për çdo orë mësimore: në shkollat e mesme 300 lekë, në shkollat 8- vjeçare 250 lekë”.
AKUZAT Në ditët e para të muajit, sapo në llogaritë bankare të mësuesve u kryen pagesat për muajin shtator, opozita akuzoi Ministrinë e Arsimit se po u vjedh mësuesve orët shtesë. Sipas ish- deputetes,
Albana Vokshi, mësuesit kanë punuar thuajse dyfishin e orëve që iu takon dhe janë paguar për vetëm gjashtë orë mësimi. Një keqinterpretim shifrash e ka cilësuar Ministria e Arsimit në kundër reagimin e saj mënyrën se si janë kalkuluar orët e qëndrimit në shkollë duke vënë në dispozicion tri modelet e lartpërmendura.