Mjekimi i pacientëve në shtëpi, Manastirliu: Gati protokollet e reja
Gjatë 24 orëve të fundit janë regjistruar 1700 thirrje dhe janë kryer 45 misione në banesë, nga të cilat 22 janë dërguar në spital dhe 23 janë trajtuar në banesë
Pas shqetësimeve të ngritura nga mjekët dhe farmacistët, duket se Ministria është vënë në lëvizje për miratimin e udhëzuesve të përditësuar që do të aplikohen për mjekimin e pacientëve që nuk shfaqin komplikacione, e për rrjedhojë, ndiqen në kushte shtëpie. Nga Qendra Kombëtare e Urgjencës, ministrja Manastirliu tha se janë dyfishuar ekipet e terrenit që do të ndjekin pacientët në shtëpi sipas protokolleve të reja që po miraton Komiteti Teknik i Ekspertëve. “Dyfishojmë ekipet e terrenit të Urgjencës Kombëtare për t’u përballuar edhe me një sfidë tjetër, që është sfida e trajtimit në banesë sipas protokolleve të reja që po miraton Komiteti Teknik i Ekspertëve për trajtimin në shtëpi të rasteve ambulatore”. Mjekët dhe farmacistët kanë ngritur shqetësimin për mënyrën se si po trajtohen të infektuarit me COVID- 19 në shtëpi. Sipas tyre, duke mos pasur një skemë mjekimi të përditësuar, mjekët e familjes janë duke dhënë pa kriter antibiotikë duke rritur rrezikun për efekte anësore te pacientët. Lidhur me shërbimin e Urgjencës, Manastirliu tha se janë duke përballuar një fluks të konsiderueshëm, ndaj edhe krahas shtimit të stafit janë shtuar edhe autoambulancat. “Padyshim vjeshtë- dimri nuk do të jetë i lehtë, por jemi përgatitur brenda mundësive tona, jo vetëm me kapacitetet që disponojmë, por edhe me stafin e shtuar, ku edhe gjatë periudhës së epidemisë janë 45 personele që i janë bashkuar ekipit të
Urgjencës Kombëtare, si edhe mbështetja logjistike nuk ka munguar dhe nuk do të mungojë. Edhe 36 autoambulanca të reja do t’i shtohen Urgjencës Kombëtare brenda vitit për të garantuar një shërbim më të mirë, më të shpejtë për qytetarët, sidomos në situatën e epidemisë”, tha Manastirliu. Nga ana tjetër, drejtori i Urgjencës Kombëtare, Skënder Brataj, deklaroi se po vijojnë trajnimet për ekipet mjekësore në të gjitha nivelet, për t’iu përgjigjur situatës. “Po vijojmë me trajnimet jo vetëm të ekipeve të reja, por të të gjithë stafit mjekësor, duke filluar nga mjekët e familjes. Ndërkohë, në bashkëpunim me mjekun e familjes dhe linjës 08004040 që bën lidhjen e menjëhershme me mjekun e familjes, do të integrojmë shërbimin në banesë. Në momentin që pacienti përkeqësohet ose në momentin që pacienti ka marrë një kurim të përcaktuar nga specialisti, mund të bëhen trajtime në banesë. Prej 3 vitesh ne kemi setin e plotë të urgjencës dhe i kemi të gjitha pajisjet. Kemi porositur të gjitha medikamentet në bazë të protokollit për sa i përket trajtimit dhe të formës së mesme nga ekipet tona”, tha Brataj. Gjatë ditëve të fundit po vihet re një rritje e lehtë e numrit të thirrjeve në numrin unik të Urgjencës Kombëtare, 127. Gjatë 24 orëve të fundit janë regjistruar 1700 thirrje dhe janë kryer 45 misione në banesë, nga të cilat 22 janë dërguar në spital dhe 23 janë trajtuar në banesë.