Rritet numri i të vdekurve në Armeni dhe Azerbajxhan
Numri i vdekjeve dhe të plagosurve është rritur sërish të martën, në javën e tretë të luftimeve midis forcave armene dhe azerbajxhanase mbi territorin separatist të Nagorno- Karabakut. Shtetet e Bashkuara u kërkuan të dyja palëve t'i përmbahen një armëpushimi të arritur gjatë fundjavës, i cili pati "sukses" vetëm pak orë. Sipas "AP"- së, zyrtarët ushtarakë të Nagorno- Karabakut thanë se 16 ushtarë u vranë, duke e çuar numrin e përgjithshëm të të vdekurve në 532 vetë që nga rinisja e konfliktit më 27 shtator. Numri i përgjithshëm i viktimave ka të ngjarë të jetë shumë më i lartë, me të dyja palët që pretendojnë rregullisht se kanë shkaktuar humbje të konsiderueshme ushtarake te njëra- tjetra. Përleshjet vdekjeprurëse shënuan përshkallëzimin më të madh të konfliktit mbi NagornoKarabak, një territor që qëndron në Azerbajxhan, por ka qenë nën kontrollin e forcave etnike armene të mbështetura nga Armenia që nga fundi i një lufte separatiste në vitin 1994. Së fundmi, ministrat e Jashtëm nga Armenia dhe Azerbajxhani nënshkruan një marrëveshje armëpushimi, e cila hyri në fuqi të shtunën. Plani u ndërmjetësua nga Rusia, e cila ka një pakt sigurie me Armeninë, ndërkohë që Moska ka kultivuar lidhje të ngrohta edhe me Azerbajxhanin. Armenia dhe Azerbajxhani kanë akuzuar njëra- tjetrën për sulme të vazhdueshme në kundërshtim me marrëveshjen. Të martën zyrtarët azerbajxhanas thanë se forcat armene hodhën granata në disa nga rajonet e saj dhe zyrtarët e Nagorno- Karabakut thanë se Azerbajxhani filloi operacione ushtarake në shkallë të gjerë përgjatë vijës së frontit. Në Stepanakert, kryeqyteti i territorit separatist NagornoKarabak, njerëzit grumbullohen në bodrumet e ndërtesave nga frika e sulmeve.