Basha: Të ndërpriten tenderët, paratë të shkojnë te qytetarët
Kreu i PD: Të rimbursohet paketa e medikamenteve që shërben për mjekimin e pacientëve me Covid- 19 që kurohen në shtëpi
Kryetari i Partisë Demokratike, Lulzim Basha, e cilëson kriminal mosreagimin e qeverisë shqiptare, edhe pas dy javësh që nga prezantimi i planit ekonomik të rimëkëmbjes nga ai dhe grupi i ekspertëve në PD.
Në ditën e 4- t radhazi kryedemokrati doli për të denoncuar keqmenaxhmin e situatës së pandemisë në një kohë që situata e infektimeve dhe ajo ekonomike në terren po përkeqësohet. “Paratë e taksapaguesve kurrë më shumë se sot nuk janë të domosdoshme për të ndihmuar ata taksapagues, ata njerëz që numërojnë kacidhet për të blerë ilaçet. Që shtojnë listat për të marrë ushqimet. Që janë në kufijtë e dëshpërimit absolut që mund të ndjejë një prind kur nuk arrin të plotësojë nevojat më minimale jetike për fëmijët. Përgjigjja cinike nuk tregon vetëm papërgjegjshmëri, por vetëm kriminalitet”, tha Basha. Teksa kujtoi se vendet e tjera të botës po ndërpresin disa investime, Basha akuzoi Kryeministrin shqiptar se është i vetmi që nuk ka bërë rialokim të fondeve për përballimin e situatës së krijuar nga Covid- 19. Sipas Bashës, qeveria nuk duhet të mjaftohet duke thënë që qytetarët të mbajnë maska kudo, por duhet që të investojë atje ku ka nevojë ekonomia shqiptare. “Vendet e tjera po ndalin tenderë të pastër, investime të pastra publike, sepse tani është momenti që lekët e shqiptarëve, lekët e taksapaguesve të shkojnë te nevojat dhe emergjencat shëndetësore dhe ekonomike. Detyra e qeverisë nuk është thjesht dhe vetëm t’ju thonë mbani maskën, apo akoma më keq, t’ju kërcënojnë me gjobë. Është të investojnë në ato segmente të shoqërisë që nuk kanë mundësi ta blejnë maskën, se s’kanë mundësi të blejnë bukën e gojës. Është të investojnë, të testojnë masivisht qytetarët dhe të hetojnë çdo rast e përgjegjësi. Është të mbrojnë mjekët, që po sëmuren, po infektohen, bashkë me infermierët dhe personelin shëndetësor. Përgjegjësia e tyre është që sot, jo kur të ketë shkuar gjithçka në kolaps total, të ndihmojnë njerëzit që kanë humbur çdo të ardhur dhe bukën e gojës për shkak të vjedhjes dhe batërdisjes me tenderë sekretë në kohë pandemie”, vijoi kryedemokrati.
PLANI ME 5 PIKA Siç kishte deklaruar më herët se nuk do të lodhej së përsërituri paketën me 5 pika, Basha i bëri thirrje qeverisë që të rrisë testimet në 2500 në ditë, dhe përpos mbrojtjes së mjekëve, të alokojë për ta edhe shtesën 1 mijë euro në muaj për mjekët dhe 500 euro për infermierët. Po ashtu, të rimbursohen edhe medikamentet për pacientët që trajtohen në shtëpi. “E përsëris, mjekimi ambulator, në rastin më të pakët 600 mijë lekë të vjetër. Ka ilaçe që kanë dalë edhe në tregun e zi, që duket se ka një efektivitet më të lartë, të paktën kështu thuhet e kushtojnë deri në 800 e deri në 1200 euro një pako. Në vend që të marrë të gjitha masat për të pasur një paketë sa më efektive antibiotikësh, antiviralësh e çfarë tjetër ka kjo paketë ta ofrojnë falas, totalisht të rimbursueshme për çdo të sëmurë me COVID. Vazhdojnë të vjedhin e të përqeshin vetveten”, tha Basha. Një tjetër rekomandim i paketës së rimëkëmbjes ekonomike nga opozita është ndihma ekonomike për personat që kanë humbur punën dhe për biznesin e vogël dhe të madh. “Asnjë shqiptar të mos lihet pas dore. Të nisë mbështetja urgjentisht me atë numër që po vazhdon të rritet nga dita në ditë prej më shumë se 100 mijë shqiptarësh, të cilët nuk kanë asnjë të ardhur, nuk kanë asnjë shpresë për të ardhur, të cilët tashmë nuk arrijnë dot të paguajnë as me lista as ushqimin, as ilaçet, as dritat dhe as minimumin për fëmijët e tyre. 160 mijë lekë të vjetër apo 16 mijë lekë të rinj në muaj për 6 muajt e ardhshëm për çdo shqiptar që ka humbur vendin e punës. Një fond punësimi për t’i mundësuar çdo biznesi një pagesë prej 20 mijë lekësh të rinj, 200 mijë lekë të vjetër për çdo person që e rimerr në punë për 6 muajt e ardhshëm”, tha kryedemokrati. Basha ishte i ashpër edhe me Prokurorinë e Posaçme Antikorrupsion. Basha i kërkoi SPAKut që të justifikojë besimin nga ndërkombëtarët dhe të justifikojë investimin për të hetuar korrupsionin në Shqipëri. “Nuk lëviz gishtin. Çfarë janë këta? Janë pa zot? Janë të frikësuar? U çuan atje si ndër më të aftët e prokurorëve. Iu është dhënë mbrojtje speciale kundër mafies, marrin rroga të majme. Sot duhet të japin përgjegjësi para shqiptarëve ose të japin dorëheqjen”, vijoi kryedemokrati.