Fis me Olsian Çelën, deputeti i PS: Inkurajoj kushëririn tim Kryeprokuror të izolojë Metën
Bujar Çela: Kryeprokurori të mos merret me hetime, por të bëjë izolimin e këtij njeriu, e ka mbushur kupën me kohë
Seanca e djeshme parlamentare, ndryshe nga ajo paraardhëse, nuk prodhoi debat të fortë politik për shkak se as Kryeministri, por as disa nga figurat kryesore politike të PS- së nuk u përfshinë në debat.
Por në këtë klime të qetë parlamentare dhe më pak debat, deputeti socialist i PS- së në Lushnjë, Bujar Çela, bëri një deklaratë të fortë. Duke e cilësuar “pseudo president”, Çela kërkoi nga foltorja e Parlamentit që kryeprokurori Olsian Çela të bëjë sa më shpejt izolimin e Metës. Duke nënvizuar edhe lidhjen familjare me kryeprokurorin, deputeti Çela tha se nuk ka nevojë që BKH- ja të bëjë hetime, pasi sipas tij, Ilir Meta tashmë e ka mbushur kupën me ato që ka bërë. Për deputetin socialist kjo kërkesë për izolimin e Presidentit Meta është një kërkesë që buron nga shumë qytete të Shqipërisë dhe për këtë shkak ai apeloi që mos të humbet kohë. “Ne kemi plot probleme, por ky grip, që unë do e quaja, një zjarr në mbarë globin, i cili na bën që të kemi edhe frikë dhe na ndërgjegjëson më shumë për t’u mbrojtur më shumë. Në rast se nuk mbrojmë veten, duhet të mbrojmë të tjerët. Është detyra jonë të dëgjojmë çdo organ këshillimor, të cilët ju qytetarë të dashur duhet t’i mirëkuptoni dhe jo t’i quajmë si teka, në mënyrën që i trajton opozita apo ‘ pseudo presidenti’ jonë. Unë nga kjo foltore inkurajoj kushëririn tim, kryeprokurorin, Olsian Çela, se ne Çelajt, si fis i madh që jemi, na bien detyra shumë të rëndësishme, që mos të merret me hetim, por të bëjë izolimin e këtij njeriu, i cili ka mbushur kupën me të gjitha gjërat. Këtë gjë nuk e duan vetëm Çelajt, e duan edhe Metët, e duan edhe ata nga
Skrapari, Tepelena, Tirana, Durrësi, se kudo, si fis i madh që jemi kemi lloj- lloj brenda nesh. Nuk ka nevojë ta hetojë BKH- ja, por duhet ta izolojë. Ju faleminderit shumë dhe ju ftoj që t’i votojmë të gjitha ligjet që janë sot në rendin e ditës”, tha deputeti socialist i Lushnjes, Bujar Çela. Këtë deklaratë deputeti i PS- së në Lushnjë e bëri teksa ishte ngritur të fliste për ligjin që u miratua dje në Kuvend për metrologjinë.