Meta e Rama përplasen pas dorëheqjes së Presidentit të Kirgistanit
Dorëheqja e Presidentit të Kirgistanit, Soronbay Zeenbekov ka shërbyer si shkrepësja në zjarrin e ndezur nga kreu i shtetit dhe Kryeministri Rama për ta mbajtur ndezur debatin mes tyre. Përmes një shënimi në “Facebook”, Presidenti Meta shprehet se populli i Kirgistanit i tregoi mbarë botës se si rrëzohen regjimet që janë të bazuara në shtypjen, manipulimin dhe poshtërimin e qytetarëve. Po ashtu Kreu i Shtetit theksoi se autorët e krimeve zgjedhore dhe dhunës kriminale duhet të vihen para përgjegjësisë. “Përshëndes dorëheqjen e Presidentit të Kirgistanit pas manipulimit të zgjedhjeve të fundit, që nuk u pranuan nga populli i revoltuar me shumë të drejtë. Populli trim i Kirgistanit i tregoi mbarë botës demokratike si rrëzohen regjimet që bazohen mbi shtypjen, manipulimin, oligarkinë dhe poshtërimin e qytetarëve. Autorët e krimeve zgjedhore dhe dhunës kriminale të vihen para përgjegjësisë!”, shkruan Meta, por nuk ka vonuar edhe përgjigja e Kryeministrit, i cili mesa duket e mori menjëherë mesazhin që ishte shkruar pa emër në adresë të tij. Kryeministri Rama përmes një shënimi në “Twitter” ka replikuar me Kreun e Shtetit, Ilir Meta, pas reagimit që ky i fundit bëri për dorëheqjen e Presidentit të Kirgistanit. “Ilir, krim zgjedhor në Republikat Parlamentare është edhe përfshirja e Presidentit si palë në zgjedhje me thikë në gojë! Ndërsa futja e Presidentit skutave nëpër lokale, ku vënë baste ilegale subjektet e OFL- së për të propaganduar rrëzimin e qeverisë me revolucion është krim mendor!”, përgjigjet Rama. Por presidenca nuk e ka lënë me kaq. Kësaj radhe, zëdhënësi i Presidentit Ilir Meta, i kërkoi Kryeministrit Edi Rama që si kryetar i OSBE- së të dënojë zgjedhjet në Kirgistan, që sipas Tedi Blushit, ishin si të Shijakut dhe të Dibrës. “Je aq frikacak sa trembesh edhe nga protestat e popullit në Kirgistanin e largët!”, shkruan ai. Zëdhënësi thotë se Presidenti e pret Kryeministrin në përballje televizive, ndërsa i kërkon të respektojë marrëveshjen e 5 qershorit. “’ Buburrec trendi’ respekto urgjent 5 qershorin, se le nam dhe dënoi në emër të OSBE- së zgjedhjet e Kirgistanit që ishin si të Shijakut dhe Dibrës. Me Presidentin ti je vite dritë larg. Ishe ti që i fute në Parlament dhe i vendose në krye të Bashkive, kriminelët dhe trafikantët. Këtë e di e gjithë bota! Presidenti të ka ftuar në përballje! Po pret studion televizive dhe orën! Pse ke frikë?! Pse mblidhesh si ‘ buburrec’ e fshihesh pas Twitter- it?! Je aq frikacak sa trembesh edhe nga protestat e popullit në Kirgistanin e largët! Ora e përballjes po afron! As në skutat e Twitter- it nuk do fshihesh dot po nuk respektove urgjent marrëveshjen e 5 qershorit!”, shkruan në reagimin e tij zëdhënësi i Presidentit Meta, Tedi Blushi.