Nga virusi te drejtësia, kanabisi e plehrat, Rama debat “live” me Bashën
Kreu i PD: “11 vjet e le Sharrën siç e le, u kujtove kur po ikje. Je hajdut”. Rama: “O Lul, shko fli gjumë. Përballja do shihet në zgjedhje”
Kryeministri Rama dhe kreu i PD- së, Lulzim Basha, u përplasën në emisionin “Opinion” të gazetarit Blendi Fevziu në lidhje me menaxhimin e mbetjeve të Tiranës.
Kryeministri Rama akuzoi kreun e opozitës se kur ishte kryetar i Bashkisë së Tiranës kishte vendosur të jepte me koncesion fushën e mbledhjes së plehrave në Sharrë. Në një lidhje telefonike, të cilën fillimisht Rama e ka refuzuar, Basha akuzoi Kryeministrin se u ka marrë shqiptarëve 72 milionë euro për përpunimin e mbetjeve. “Sharra ishte lënë në mjerim për 11 vjet dhe u trajtua denjësisht nga ana jonë kur morën Bashkinë. Tirana do të kishte kontejner nën tokë. Ti tregoju shqiptarëve se pse kur as taksapaguesit e Tiranës dhe as ata shqiptarë nuk do paguanin asnjë lek dhe Tirana do kishte kontejnerët në tokë, pse i vure shkelmin studimit të Bankës Botërore? Sot që po flasim u keni marrë 75 milionë euro shqiptarëve, për tre inceneratorë, me një pronar që i ka regjistruar me kompani guaska jashtë shtetit, me një pronar me precedentë penalë, anëtar të bandës së Lushnjës, këtë tregoju shqiptarëve ti”, tha ndër të tjera Basha. Përgjigja e Kryeministrit ishte një batutë: “O Lul, shko fli gjumë. Lul, fli gjumë. Fli, habitem. Lul fli zemër, fli gjumë. Ik mos na banalizo tani. Përballja do të shihet në zgjedhje”. “11 vjet e le Sharrën siç e le, u kujtove kur po ikje. Po shkatërron bizneset. Je hajdut”, ishte përgjigjja e Bashës.
PANDEMIA Kryeministri Rama nuk e ka mohuar rikthimin në izolim të vendit, nëse numrat e të infektuarve rriten ndjeshëm. Rama theksoi se për të mos u kthyer në izolim, duhet që të gjithë qytetarët të mbajnë maskën dhe të zbatojnë protokollet e tjera shëndetësore. Sa u përket kapaciteteve në spitalet COVID, Kryeministri theksoi se kemi rreth 50% të kapacitete të lira. “Jemi shumë larg kapaciteteve të plota. Kemi 50% të kapaciteteve të lira. Di që nga pikëpamja e përgatitjes jemi të përgatitur për skenarin e vjeshtë- dimrit me kohë. Strategjia për këtë kohë është në tavolinën time që në qershor. Rrezikojmë patjetër një mbyllje tjetër. Duhet të mbajmë maskën kudo. Duhet të respektojmë distancën. Nuk duhet të mblidhemi për dasma, për të bërë muzikë etj. Unë personalisht maskën e kam tmerr. Kam edhe problemin tim që kam atë astmën e vjetër, që nëse nuk kam atë frymëmarrjen normale, kam edhe probleme, por unë nuk i hyj këtyre filozofive. Unë dëgjoj çfarë thonë ata që e dinë këtë punë”, tha Rama. Kreu i qeverisë tha se maskat do të jenë të detyrueshme deri në këtë periudhë, pasi nuk dihet se çfarë do të sjellë edhe gripi sezonal. “Maskat do të qëndrojnë deri në dalje të dimrit. Çështja është çfarë do të sjellë më shumë gripi stinor. Gjobat do të merren çdo muaj në faturën e dritave dhe nuk do të falen”, pohoi ai. I pyetur nëse do të ketë një paketë të tretë mbështetëse ndaj pasojave të COVID, Kryeministri tha se “maskat e veta i bën vetë”. “Nuk e kam thënë asnjëherë që do të ketë. Unë nuk numëroj miliona në televizor, por shoh shifrat konkrete dhe disbursimet e të gjitha vendeve. Deklaroi edhe Serbia që ishte edhe më e madhe se e gjithë botës, se ishte para zgjedhjeve, por çfarë u ka shkuar qytetarëve në xhep është komplet tjetër nga ajo. E çfarë janë nga ato shifra kredi e çfarë janë pagesa direkte, është një gjë krejt tjetër”, tha Rama. Kryeministri Rama mohoi që ka trend rritës të kultivimit të kanabisit, ndërsa theksoi rëndësinë e Reformës në Drejtësi. “Reforma në Drejtësi u bë se isha unë dhe Partia Socialiste. Për herë të parë u godit korporata e prokurorëve dhe gjyqtarëve. Po nuk hynë në burg ata që e kanë menaxhuar korrupsionin e politikës, ata që kanë qenë të kupolës, që ishin fitimprurësit më të mëdhenj me korrupsion me togën e gjykatësit, harroje se mund të pastrohet politika. Nuk ndodh! Ka gjyqtarë që e dinë se nuk e kalojnë vettingu- n dhe vazhdojnë të bëjnë krime. Politikanët bëjnë korrupsion. E bëjnë korrupsionin se ata që janë aty për të goditur këtë korrupsion, janë më të korruptuar nga të gjithë”, tha Rama në “Opinion”.
“Jemi shumë larg kapaciteteve të plota. Kemi 50% të kapaciteteve të lira. Di që nga pikëpamja e përgatitjes jemi të përgatitur për skenarin e vjeshtë- dimrit me kohë. Strategjia për këtë kohë është në tavolinën time që në qershor. Rrezikojmë patjetër një mbyllje tjetër. Duhet të mbajmë maskën kudo. Duhet të respektojmë distancën. Nuk duhet të mblidhemi për dasma, për të bërë muzikë etj. Unë personalisht maskën e kam tmerr.