Meta dhe Rama presin zv. sekretaren amerikane për Arsimin e Kulturën
Presidenti Meta dhe Kryeministri Rama pritën dje në dy takime nënsekretaren e Shtetit për Arsimin dhe Kulturën, Marie Royce. Në fokus të dy takimeve sipas atyre që kanë zbardhur kryeministria dhe presidenca ka qenë përmirësimi i marrëdhënieve mes dy vendeve në fushat e arsimit dhe kulturës. Sipas Metës dhe Ramës, një rritje e bashkëpunimit dhe shkëmbimeve mes Shqipërisë dhe SHBA në këto fusha do kishte një efekt shumë të mirë për vendin.
PRESIDENTI Presidenti Meta shkroi në profilin e tij në “Facebook” se rritje e bashkëpunimit të Shqipërisë dhe SHBA- së në fushën e arsimit dhe kulturës do i shërbejë më shumë së ardhmes së vendit.” I lumtur të takoja ndihmëssekretaren e Departamentit Amerikan të Shtetit për Arsimin dhe Kulturën, znj. Maria Royce. Vlerësova rëndësinë që ka vizita e saj për të konsoliduar e forcuar më tej marrëdhëniet tona në fushën e arsimit dhe të kulturës. Duhet të synojmë, që sa më shumë studentë shqiptarë të arsimohen e edukohen në SHBA, por njëkohësisht, edhe krijimin e kushteve që ata të kthehen në vendin e tyre, për t’u bërë liderët e ardhshëm të tij. Bashkëpunimi në fushat e arsimit dhe të kulturës ndërmjet Shqipërisë dhe SHBA do t’i shërbejë së ardhmes të vendit tonë dhe do të promovojë mirëkuptimin ndërkulturor, si një mundësi reale për të afruar më shumë popujt tanë”, shkroi Presidenti Meta.
KRYEMINISTRI Ndërsa Kryeministri Rama shkroi në postimin e tij, që e shoqëroi me foto nga takimi me zyrtaren e lartë amerikane, se zgjerimi i bashkëpunimit mes Shqipërisë dhe SHBA mbetet një prioritet. “Me nënsekretaren e Shtetit për Arsimin dhe Kulturën, Marie Royce, në vazhdën e vizitave të nivelit të lartë të qeverisë amerikane në Shqipëri, në funksion të zgjerimit të prezencës në vendin tonë e të bashkëpunimit me qeverinë shqiptare, për rritjen e investimeve e fuqizimin e mbështetjes për Shqipërinë në çdo fushë”, shkroi Kryeministri Rama në postimin e tij në “Facebook”.