Protesta “antimaskë”, qytetarët i djegin para Kryeministrisë

Maska e detyrueshme në të gjitha ambientet publike ka ngjallur revoltën e qindra mijëra qytetarëve, të cilët shprehën virtualisht mllefin e tyre “anti- maskë”. Të paktë ishin ata që dolën dje në protestën e paralajmëruar kundër masës drastike të qeverisë që i detyron të gjithë për mbajtjen e maskës në çdo ambient tjetër, veç shtëpisë. Në shenjë revolte ndaj aktit normativ, dhjetëra protestues të mbledhur përpara Kryeministrisë dogjën maskat që kishin marrë me vete. Me thirrjet “djegie e diktaturës”, ata paralajmëruan se në atë zjarr do të digjej jo një, por të gjitha aktet normative të qeverisë që kufizojnë të drejtat e individit. “Ia vlen të protestosh dhe i vetëm kundër një ligji të padrejtë që nxjerr me akt normativ Kryeministri. Kundër shkeljes kushtetuese është një nen i veçantë mbi liritë dhe të drejtat e njeriut. Kryeministri nxjerr vendime arbitrare”, u shpeh një protestues, ndërsa një tjetër e cilësoi vendimin e fundit si të parin hap drejt bindjes popullore. “Për t’i thënë jo diktaturës së maskave, për t’i çjerrë maskat sistemit globalist që na sundon. Kjo është vrasje, është vdekje. Kjo është faza e fundit e axhendës për shpopullimin e shqiptarëve. Maskat janë hap i parë për të demonstruar nënshtrimin. Koncepti është që ajo maskë është fillimi, vazhdimi është ky. Të enjten, hyri në fuqi vendimi për maskat e detyrueshme në çdo ambient, pasi në të kundërt do të kenë gjoba 3 mijë lekë që do të vilet në faturën e energjisë elektrike. Forcat blu të Tiranës arritën të shpërndanin protestën në kohë rekord, pasi bëri shoqërimin e tre personave në Polici. Midis tyre mësohet të jetë edhe deputeti Kujtim Gjuzi, të cilit i kanë kërkuar të largohet nga tubimi.