Aida Hajnaj: Byroja Kombëtare, gati në janar
“Në dhjetor do jenë përzgjedhur 60 hetues në të gjitha fazat”
Nga 426 kandidatë për të qenë hetues të Byrosë Kombëtare të Hetimit, vetëm 23 janë skualifikuar gjatë testimit logjik që u mbyll dy ditë më parë. Kandidatët e kualifikuar në Testin e Arsyetimit Logjik në datat 19.10.2020 – 22.10.2020 do t’i nënshtrohen Testit të Aftësive Fizike, që do të zhvillohet në ambientet e Repartit Special RENEA, në Yzberisht. Për shkak të numrit të lartë të kandidatëve të kualifikuar, testimi do zhvillohet si vijon: datë 19.10.2020, do paraqiten për testim kandidatët që janë në listë, me numër rendor 1 deri në 100; datë 20.10.2020, do paraqiten për testim kandidatët që janë në listë, me numër rendor 101 deri në 201; datë 21.10.2020, do paraqiten për testimin kandidatët që janë në listë, me numër rendor 202 deri në 302; datë 22.10.2020, do paraqiten për testim kandidatët që janë në listë me numër rendor 303 deri në 403. Kandidatët në ambientet e Repartit Special RENEA duhet të paraqiten në orën 08: 00. Kandidatët do të jenë të pajisur me maska për sigurinë shëndetësore të tyre, ndaj pasojave të infeksionit COVID – 19. “Merrni atlete dhe veshje sportive të përshtatshme për vrapim, si edhe pije freskuese. Kandidatët para fillimit të Testit të Aftësive Fizike do të regjistrohen duke paraqitur një dokument identifikimi me fotografi ( pasaportë ose kartë identiteti). Dokumenti i identifikimit do të krahasohet me gjeneralitetet e parashikuara në listën emërore. Kandidatët, para se të marrin pjesë në test, do të dorëzojnë te Komisioni i Përzgjedhjes Raportin Mjekësor nga specialisti kardiolog, që vërteton që janë të aftë fizikisht për të marrë pjesë në këtë test pa rrezikuar për infarkt kardiak ose komplikacione kardiovaskulare”, thuhet në njoftimin e BKH. Ndërkohë, dy ditë më parë, drejtoresha e BKH- së, Aida Hajnaj, tregoi për “Top Channel” se BKH do të jetë gati në janar: “Janë disa faza që duhet të kalojnë deri sa të arrijmë në fazën që të marrim 60 hetuesit dhe mendojmë se deri nga fundi i dhjetorit duhet të jenë të përfunduara të gjithë fazat që duhet të kalojnë. Me parashikime, ne mendojmë dhe duam që në janar të fillojë puna e BKH”, u shpreh Hajnaj.