Apeli i Posaçëm lë në fuqi pezullimin e zv. drejtorit të OFL
Artan Shkëmbi kërkoi shfuqizimin e masës “Pezullimi nga detyra”
Gjykata e Posaçme e Apelit ka zhvilluar dje seancën gjyqësore ndaj zv. drejtuesit të OFL- së, Artan Shkëmbit, duke lënë në fuqi masën e “Pezullimit nga detyra”.
Seanca është zhvilluar pas apelimit të vendimit të dhënë nga Shkalla e Parë, ku Shkëmbi kërkoi nga Apeli shfuqizimin e atij vendimi. Sipas avokatit Artan Broci, vendimi i Shkallës së Parë i Gjykatës së Posaçme është i paarsyetuar. Avokati pretendon se provat janë administruar dhe se qëndrimi i tij në detyrë nuk rrezikon prishjen e tyre. Nëndrejtori i Operacionit Forca e Ligjit u pezullua nga detyra me firmë të Drejtorit të Përgjithshëm të Policisë së Shtetit, Ardi Veliu. Pak kohë pasi kaloi të tre filtrat e vetingut, atë profesional, moral e pasuror, Artan Shkëmbi u pezullua nga detyra më 28 shtator. Mbi të rëndojnë akuzat “Shpërdorim detyre” dhe “Nxjerrje sekreti”.
AKUZAT Artan Shkëmbi dyshohet se ka dekonspiruar të dhëna për një grup kriminal që ishte nën hetim nga autoritetet gjermane. Kjo çështje është duke u hetuar dhe ka të ngjarë që të ketë të përfshirë dhe zyrtarë të tjerë të Policisë. Vendimi për pezullimin e tij u mor nga Gjykata e Posaçme kundër Korrupsionit dhe Krimit të Organizuar dhe u pasua nga një urdhër i kryepolicit Ardi Veliu. Artan Shkëmbi ka mbajtur disa detyra të rëndësishme në Policinë e Shtetit, ndërsa kandidoi edhe për të marrë drejtimin e Byrosë Kombëtare të Hetimit, por nuk arriti të kualifikohet në fazën e testit të poligrafit. Në shkurt 2020, ai kaloi me sukses testin e vetingut, pavarësisht probleme që u relatuan nga trupa gjykuese në shtyllën e pasurive dhe figurës morale. Ndërkohë, lidhur me akuzat e ngritura nga SPAK, avokati mbrojtës i Shkëmbit, Artan Broci, është shprehur më herët se në dosje nuk ka asnjë provë ndaj tij. “Nuk ka asnjë provë që zoti Shkëmbi të ketë pasur telefon apo mjet komunikimi ‘ encrochat’. Jemi shumë të interesuar për ta zbardhur këtë çështje për shkak edhe të korrektësisë që ka në karrierën e tij. Ai ka drejtuar shumë operacione sekrete dhe të vështira më shumë se këto. Ne po kërkojmë zbardhjen e së vërtetës”, tha avokati Artan Broci. Në dosjen hetimore, SPAK thotë se numri dy i OFL- së, ka nxjerrë të dhënat e hetimit te grupi kriminal nëpërmjet komunikimit me programin e quajtur “Encrochat”.