VENDIMI PËR REGJISTRIMIN E SHTËPIVE TË VJETRA
Pjesë nga Vendimi 442 “Për përcaktimin e procedurës së kalimit të pronësisë e të regjistrimit të pasurisë së paluajtshme, të ndërtuara deri më 10.08.1991 dhe të truallit funksional të tyre”
Procedurat e kalimit të pronësisë nisin pas kërkesës së bërë fillimisht nga qytetarët, pavarësisht nëse zona i është nënshtruar ose jo regjistrimit fillestar.
Kadastra evidenton në terren ndërtimin dhe truallin funksional, një procedurë kjo që duhet të kryhet brenda 10 ditëve nga depozitimi i kërkesës.
Sipërfaqja e truallit funksional dhe kufijtë e tij përcaktohen nga Kadastra gjatë procedurave të evidentimit në terren dhe pasqyrohen në genplan. Në përcaktimin e sipërfaqes, Kadastra bazohet në kufijtë faktikë të sipërfaqes së poseduar, pa tejkaluar masën prej 300 metrash katrorë.
Kalimi i pronësisë së ndërtimit dhe truallit funksional, për sipërfaqet deri në 300 metra katrorë, kryhet pa pagesë.
Me kërkesë të posaçme, subjektit mund t’i kalohen në pronësi pjesët e sipërfaqes shtetërore mbi masën e përcaktuar në pikën 14 të këtij vendimi, deri në 500 metra katrorë. Përjashtimisht, nëse nga konfigurimi i truallit funksional rezulton se krijohen sipërfaqe të lira, që tejkalojnë masën e 500 metrave katrorë dhe që nuk mund të shfrytëzohen më vete për ndërtime të reja.
Për procedurën e ndjekur, subjekti përfitues paguan për llogari të Kadastrës tarifën e shërbimit, në vlerën 8 000 lekë për çdo kat ndërtimi, e cila përdoret për të përballuar shpenzimet e evidentimit në terren dhe shpenzimet e tjera të procedurës administrative. Kjo tarifë i njoftohet përftuesit menjëherë pas përfundimit të periudhës së afishimit, nëse përmbushen kushtet për të përfituar kalimin e pronësisë, sipas këtij vendimi.
Të ardhurat e arkëtuara sipas kësaj pike ndahen si më poshtë vijon: a) 70 për qind në fondin e kompensimit të pronave, të parashikuar në ligjin nr. 133/ 2015, “Për trajtimin e pronës dhe përfundimin e procesit të kompensimit të pronave”; b) 30 për qind për llogari të Kadastrës, për përballimin e shpenzimeve të evidentimit në terren dhe të shpenzimeve të tjera të procedurës administrative.