Meta: Gjaku nuk iu shkoi dëm! Heroizmi i tyre frymëzoi mijëra të rinj
Presidenti Meta, dje ka nderuar 4 dëshmorë të rënë në Luftën e Dytë Botërore kundër pushtuesve fashistë. Në 78- vjetorin vrasjes nga pushtuesit italianë të Hajredin Bylyshit, Mumin Selamit, Barjam Tushit dhe Hiqmet Buzit, Meta vendosi kurora me lule në memorialin kushtuar këtyre 4 dëshmorëve të vendit. Sipas kreut të shteti, gjaku i dhënë nga këta dëshmorë nuk shkoi kot, pasi ata shërbyen si frymëzim për mijëra të rinj të tjerë, që luftuan deri në fund për çlirimin e vendit. “Si sot, 78 vjet më parë, në 18 tetor 1942, Topanaja, një nga lagjet më antifashiste të Vlorës, u ndez tym e flakë dhe mbajti frymën për orë të tëra nga krismat e gjëmimet e një prej betejave më heroike të Luftës Antifashiste. Rreth 400 milicë fashistë e bashkëpunëtorë të tyre, të informuar nga spiunë e tradhtarë, kishin rrethuar në pabesi shtëpinë e Murat Lamçes, ku strehoeshin katër të rinjtë antifashistë, Hajredin Bylyshi, Mumin Selami, Barjam Tushi dhe Hiqmet Buzi. Thirrjes së armikut për t’u dorëzuar, ata ju përgjigjën me plumba dhe granata, ashtu siç thonë edhe vargjet e popullit “trimat lindin po kurrë nuk vdesin, plumbat në gjoks i presin dhe vatanin nuk e shesin”. Të katërt ranë heroikisht për të mos vdekur kurrë, duke shkruar me gjakun e tyre një nga faqet më të ndritura të Epopesë së Lavdishme të LANÇ- it, dhe kaluar në përjetësi me trimërinë e patriotizmin deri në vetëmohim, si burim i përjetshëm frymëzimi për të gjithë gjeneratat e reja në betejat për liri. Betejat heroike të Tre Heronjve të Shkodrës, të Vojo Kushit dhe shokëve të tij në Tiranë dhe të 4 Heronjve në qytetin e Vlorës ishin dëshmia më e madhe e atdhedashurisë dhe urrejtjes ndaj pushtuesit. Gjaku i tyre nuk shkoi dëm! Heroizmi i tyre shtoi urrejtjen për pushtuesit dhe frymëzoi dhjetëra mijëra të rinj për t’iu bashkuar Lëvizjes Antifashiste dhe formacioneve partizane. Lavdi të përjetshme dëshmorëve të atdheut!”, shkroi ndër të tjera Presidenti Meta në “Facebook”.