Mijëra francezë nderojnë mësuesin e historisë të vrarë nga terroristi
Mijëra demonstrues u mblodhën në shenjë nderimi për një mësues historie, të cilit iu pre koka brutalisht në një shkollë afër Parisit, për shfaqjen e karikaturave të Profetit Muhamed në klasën e tij. Samuel Paty, 47 vjeç, u godit brutalisht me thikë për vdekje dhe iu pre koka nga Aboulakh Anzorov, 18 vjeç, në një periferi veriore të kryeqytetit francez. Në Paris, mijëra francezë, përfshirë Kryeministrin francez, Jean Castex, u mblodhën për t’i bërë homazh mësuesit të vrarë në një shfaqje sfiduese të solidaritetit në “Place de la Republique” ( Sheshin e Republikës). Një moment heshtjeje u mbajt në të gjithë sheshin, i thyer nga duartrokitjet dhe një interpretim i “La Marseillaise”, himni kombëtar francez. Të tjerët thërrisnin: “Liria e shprehjes, liria e mësimdhënies”. Demonstrues pati në qytetet kryesore duke përfshirë Lion, Tulus, Strasburg, Nantes, Marsejë, Lilë dhe Bordo. Hetimet janë përqendruar te Brahim Chnina, babai i një vajze 13- vjeçare në klasën e Paty, i cili denoncoi mësuesin në internet dhe dha detaje të shkollës. Ai është arrestuar. Pas vrasjes, Anzorov ndau foto dhe video në internet me kanalet çeçene të ISISit, “Telegram”, dhe gjithashtu denoncoi Emmanuel Macron si
“udhëheqësin e pabesëve”. Xhaxhai i vrasësit tha në televizionin francez: “Ai ishte fëmijë. Ishte vetëm 18 vjeç. Po të ishte akoma gjallë, do ta pyesja: ‘ Pse e bëre atë? Çfarë po të shkonte në kokë?’ Ai duhet të jetë ndikuar nga dikush”. I dyshuari, të cilit i ishte dhënë një rezidencë 10- vjeçare si refugjat në mars. Paty kishte marrë kërcënime pasi tregoi karikaturën gjatë një klase për lirinë e fjalës rreth 10 ditë më parë. Mësuesi i kishte ftuar studentët myslimanë të largoheshin nga klasa para se të tregonte karikaturën. Sidoqoftë, një nxënëse myslimane kishte qëndruar dhe më vonë u tregoi prindërve të saj.