“Kryeministri përdor gjuhë vulgare rrugësh”, Topi flet për përplasjen Rama- Meta: Presidenti po ruan ekuilibrat
"Kreu i shtetit, me kompetenca të limituara tenton që të ekuilibrojë, por nga fuqia e madhe që ka Rama, e bën të pamundur balancimin"
Sot nuk vlerësohet bindja politike, por njihet vetëm mekanizmi i votës. Edi Rama ka një dëshirë patologjike për ta keqpërdorur kolltukun
Ish- Presidenti i vendit, Bamir Topi, i ftuar në emisionin "Kjo javë" nga gazetarja Nisida Tufa në "News 24", tha se gjuha e kreut të qeverisë i duket vulgare, ndërsa e shikon Presidentin Meta nga pozicioni i ruajtjes së ekuilibrave.
Zoti Topi akuzoi Kryeministrin Rama për dëshirë patologjike për të qëndruar në pushtet, ndërsa tha se e ka lënë vendin pa institucione, siç është rasti i Gjykatës Kushtetuese, një kusht i vendosur dhe nga Bundestagu gjerman për hapjen e negociatave.
Po i afrohemi periudhës zgjedhore dhe ka një ashpërsim tonesh mes Presidentit Meta dhe Kryeministrit Rama. Si e shihni këtë përplasje, pozicionin e Presidentit në raport me qeverinë dhe opozitën?
"Përplasjet në politikë janë normale. Problemi është se me kalimin e viteve, është vulgarizuar gjuha e komunikimit me publikun apo me kundërshtarin politik. Ka pasur liderë politikë të ashpër, por nuk kanë përdorur gjuhë vulgare. Politika e ditëve tona, pranon deklarimin e fakteve dhe t'ia bëjë prezent publikut, por ajo që është e papranueshme është vulgarizimi i terminologjisë në komunikimin politik. Më tepër nga ana e kujt? Unë them se kanë kaluar 22 vjet që ka nisur vulgarizimi i gjuhës politike. Ka qenë viti 2000, kur në skenën politike shqiptare dhe specifikisht në zgjedhjet lokale në Tiranë, kur Edi Rama ulëriste në sheshin Skënderbej me gjestkulacione "Doktor Rrumpalla" etj. Deri në atë kohë politika ka qenë e ashpër, është përdorur për fat të keq edhe arma në parlament, por fyerjet nisën në atë vit. Filloi të bëhet modë sulmi përmes fyerjes, madje e adaptuan edhe ata që nuk kishin përdorur asnjëherë terminologji vulgare. Sot është kthyer në një standard të politikës, ku pëlqehet më shumë ai që përdor një vokabular rruge.
Presidenti dhe Kryeministri, në deklarata apo statuse në "Facebook", ka një gjuhë të ashpër, si ju duket?
Kjo është një marrëdhënie shkak- pasojë. Mos mendoni se njëri do sulmojë dhe tjetri do të qëndrojë inert. Për fatin e keq kjo kthehet në gjuhën e institucioneve. Nga nis sulmi për ju? Unë jua thashë, se njeriu që ka përdorur gjuhë vulgare është zoti Rama, të tjerat janë për pasojë dhe të detyruar që të vazhdojnë. Sigurisht që kjo nuk është një gjë e mirë, sepse tek e fundit nuk është më Edi Rama apo Ilir Meta, por ata përfaqësojnë dy institucione që janë në këtë marrëdhënie. Presidenti Meta a e balancon pushtetin? E ka të pamundur të balancojë pushtetin, sepse është një pushtet që pas 2008 palët politike e kanë dobësuar shumë. Zoti Meta ka një post me kompetencat të limituara dhe falë eksperiencës së tij dhe natyrës së tij, po mundohet të ekuilibrojë, por nga fuqia e madhe që ka Rama që kontrollon të gjitha pushtetet e bën të pamundur balancimin, kushdo që të ishte në pozicionin e zotit Meta. Më thoni një institucion që Edi Rama nuk e ka?! Edhe ata që konsiderohen si pushtetet të pavarura, kanë marrë bekimin politik të....
Dhe mesa duket, kështu siç kanë shkuar gjerat, ai i ka marrë të gjitha institucionet, por ai kërkon dhe mandatin e tretë qeverisës. A është koha për rotacion politik, a është koha që të ikë zoti Rama?
Këtu nuk është problemi nëse ne shikojmë maxhorancën aktuale dhe opozitën politike. Problemi është se çfarë mendohet në popull, sepse jo domosdoshmërisht ata që janë në partitë politike arrijnë të absorbojnë dhe përfaqësojnë interesat e njerëzve. Politika në Shqipëri ka treguar se fillon një betejë shumë e ashpër, evidentohen shkelje ligjore shumë të forta, bëhen betime se abuzuesit me pushtetin do të shkojnë para drejtësisë, dhe në fund, kur bëhet rotacioni dhe gjithçka shkon siç ka qenë. Kjo është një histori që nuk mund të shkojë më kështu. Çfarë mendojnë njerëzit për Kryeministrin aktual? Këtë nuk e shohim, unë e shoh dhe e kam thënë dhe më parë. Në emisionin e "News 24" "Koha për t'u zgjuar", unë shoh një ndjeshmëri të madhe të njerëzve në mëngjes dhe luksit politik në studiot e darkës, ku ulet aristokracia e politikës, ndërsa në mëngjes është zëri i popullit. Më thoni: kë duhet të besoj, ata të mëngjesit apo ata të darkës?! Kryeministri sot ka për detyrë t'u drejtojë sot njerëzve çfarë ka premtuar dhe çfarë ka realizuar se kanë kaluar 8 vjet, ndërsa opozita duhet të thotë se çfarë perspektive ka për realitetin. Sepse nuk ka mbetur gjë më, janë denoncuar të gjitha. Nuk mund të futen në start me të njëjtin objeksion, ti ke si objeksion të fitosh zgjedhjet, por nuk duhet të thuash se çfarë do të bësh, por duhet të japë llogari se çfarë ka premtuar dhe çfarë ke bërë. Edi Rama bën komunikime të përgatitura dhe i stis sikur janë normale, por në fakt është regji, është çdo gjë e përgatitur në detaje, kemi të bëjmë me propagandë të pastër.
Një polemikë mes maxhorancës dhe Presidentit ka lindur dhe nga disa dekorime që ka bërë Presidenti, si Avni Rustemin, Vasil Naçin apo Vojo Kushin. Edhe ju keni bërë dekorime në kohën tuaj, si i vlerësoni dekorimet e zotit Meta?
Së pari, ai që ka shërbyer si President 5 vite në atë ndërtesë nuk duhet të komentojë vendimet e pasardhësit. Në çdo rrethanë jam i predispozuar që të jap vlerësimet institucionale dhe të jap mbështetjen time sa herë ai institucion ka nevojë. Është kod moral i pashkruar që duhet të respektohet. Është e drejta ekskluzive e Presidentit për aq sa ia jep ligji, që të bëjë dekorimet. Në linjën e dekorimeve ka dekorime të natyrave të ndryshme. Një pjesë e dekorimeve vijnë nga propozimet e institucioneve të tjera, për artistë, sportistë, është dikasteri përkatës. Por kjo s'ia heq të drejtën Presidentit që ai të ketë ekskluzivitet kur ai do të dekorojë një figurë të caktuar. Unë nuk futem në bindjen e Presidentit për të dekoruar një figurë të caktuar, është detyrë e tij. Mua më ra rasti që të jem në vigjilje të 100- vjetorit të shtetit shqiptar. Kur e kam dekoruar Ismail Qemalin me "Urdhrin e Flamurit", shikoja që ai që ngriti flamurin, që shënoi datën e shtetit shqiptar, nuk e kishte dekoratën e "Urdhrit të Flamurit". "Urdhrin e Flamurit" e mbante vetëm një institucion, ishte Komuna e Pezës për shkak të Konferencës së Pezës. Përfytyroje se çfarë ndodh këtu. Përderisa është zgjedhur Presidenti i republikës, ai operon në kuadër ligjor, por ka dhe vullnetin e tij. Një pjesë e mirë e dekorimeve vinte nga institucionet e tjera.
Me kë këshilloheshit kur kryenit dekorimet në kohën tuaj si President?
Po ndaj diçka me ju për herë të parë, se nuk ndihem mirë që s'kam arritur që të dekoroj të gjithë ata, pasi ishte një listë e gjatë. Pastaj ishte një grup këshilltarësh dhe bëhet gjykim mjaft analitik dhe më pas është vendimmarrja e Presidentit për të bërë dekorimet.
Ka një ftesë nga ana e Presidentit për ta ftuar në debat Kryeministrin, por ky i fundit nga ana e tij e ka ironizuar, duke thënë se ai duhet ta ndajë se kush është kreu i opozitës. Përtej postit të Presidentit, mendoni se zoti Meta po kërkon diçka tjetër për vete?
Është në vullnetin e Presidentit dhe unë nuk mund të bëj një analizë të subkoshiencës së tij. Meta duhet kuptuar ashtu siç është. Ai vërtet është në një karrige të lartë shtetërore, por profilin politik e ka shumë të fortë, madje dhe kur i është bërë CV- ja në momentin kur do të zgjidhej President, i është vënë në dukje se është një politikan karriere. Ju mendoni se në mënyrë artificiale dhe mekanike, dikush shkon President dhe del nga profili politik?! Jo! Çështja është se kur ti ekzekuton një vendim apo një dekret, aty duhet të jesh i çliruar nga pasionet partiake dhe të jesh në funksionet kushtetuese.
Po letrën e tij drejtuar socialistëve para asamblesë së tyre Kombëtare?
Nuk mund ta ndash Metën President nga Meta eksponent i politikës qysh nga rinia e tij e hershme në forumet rinore të PS- së. Edhe unë isha në politikë, shkova President dhe u ktheva sërish në politikë apo zoti Berisha. Çështja është se sa kohë nuk është e rregulluar në mënyrë taksative në Kushtetutë, këta profile politike do t'i kemi në politikë. Ju zoti Topi, do të hyni në zgjedhje? Nuk mund të mbijetojë një parti politike pa hyrë në zgjedhje. Si do të hyni në zgjedhje? Përgjigjen do ta kemi pas pak ditësh, sepse gjërat janë të ngatërruara midis atyre që kanë bërë një pakt, siç është ai i 5 qershorit. Por "5 qershori" mund të jetë një pakt i atyre që e kanë negociuar, por nuk mund të jetë data ime. Këto data janë tipike për ngjarjet e kohës së komunizmit, kur nuk diskutohej për ngjarjen, por diskutohej për datën, e cila kishte konotacionin dhe përmbajtjen e asaj që ka ndodhur. Pyetja është nëse "5 qershori" i plotëson ato pritshmëri që i kanë dhe partitë e tjera?! Këta e kanë ndarë parti e madhe, parti e vogël, por kështu ndodh kur ti nuk i nis në start në të njëjtën kohë njëlloj. I bie që njëri ka të gjitha potencialet. Ka potencialet ekonomike, ka potencialet për të administruar zgjedhjet. Dikush ka të gjitha potencialet dhe sigurisht që do ketë oreksin më të madh. Ju zoti Topi, personalisht jeni i zhgënjyer nga zoti Rama? Unë nuk kam asgjë personale me askënd. Zotit Rama i mungon ajo që duhet të ketë një njeri normal në politikën vendimmarrëse, kredibiliteti i marrëdhënies. Edi Rama premton rrugës dhe në fund nuk ka asnjë merak se i prish. Po ashtu, Rama nuk më ka bindur si kryetar qeverie, sepse jepet me sipërfaqen, e nuk ka gjëra thelbësore. E treta, zoti Rama në krye të maxhorancës është pa institucione. Kërkesa për Gjykatën Kushtetuese tashmë vjen dhe nga Berlini si kusht për negociatat. Demokracia mund të ketë dështime, por ka transparencë. Zoti Rama nuk e njeh transparencën dhe përpiqet që dështimin ta mbysë me errësirë, kjo është e keqja më e madhe.
Si e keni parë, zoti Topi, procesin e përzgjedhjes së kandidatëve për deputetë në PD?
Unë nuk merrem me metodologjinë e ndjekur në një parti tjetër, sepse nuk jam analist politik. Në parim, çdo gjë që tenton të bëhet demokratike, është e lavdërueshme. A shikoni alternativë fituese tek opozita? Nëse nuk do të ishte, do të ishte një mjerim shumë i madh për këtë vend, sepse të gjithë flasin për demokraci, por unë e shoh zotin Rama që nga viti 1999, pra 21 vjet në pushtet. Nëse do të shpaloste alternativa të besueshme, një vizion politik të qartë, do të isha menduar shumë për të dhënë një përgjigje. Nëse zgjedhjet e para janë fituar me tepsi dhe të dytat me timon, më rezulton se ai që i ka fituar këto zgjedhje, as di të gatuajë dhe as di t'i japë makinës. Sot nuk vlerësohet bindja politike, por njihet vetëm mekanizmi i votës. Edi Rama ka një dëshirë patologjike për ta keqpërdorur kolltukun.