Rama në Mynih: E pakuptimtë të privohen vendet e Ballkanit nga negociatat

“Nuk mund të imagjinoj një shtëpi që funksionon mirë ku nipërit e vegjël u vënë veto gjyshërve të BE- së ( Adenauerit dhe De Golit)”

Kryeministri Edi Rama, në fjalimin e tij në Forumin “Europa Park” në Mynih të Gjermanisë, tha se është e pakuptimtë që të privosh vendet e Ballkanit Perëndimor nga negociatat për anëtarësim në Bashkimin Europian.

Kryeministri theksoi se “tashmë është marrë vendimi për negociatat, është vendimi për të çelur apo për të nisur Konferencën e Parë Ndërqeveritare. Pozicioni ynë është shumë i çuditshëm. Ne jemi të dashuruar me një dashuri të verbër për Europën që nuk e vëmë në pikëpyetje. Thuhet që Europa do të ‘ martohet’ me ne, por si mund të martohesh kur nuk flet? Pra duam të martohemi me ju, por nuk jemi gati të flasim”, tha Rama. Kreu i qeverisë tha se “anëtarësimi është një tjetër histori, por ndërkohë që negociatat janë gjëja më e rëndësishme për vendet tona, ato përbëjnë udhërrëfyesin dhe mjetet për të bërë vendet tona shtete të besueshme demokratike”. “Anëtarësimi do të vijë si pasojë e kësaj, por negociata është reale për ne dhe të privosh vendet nga ky instrument është e pakuptimtë. T’u japësh vendeve këtë instrument është t’i ndihmosh ata”, tha Rama. Kryeministri Rama më tej ka treguar se Presidenti francez Macron i ka shprehur dëshirën që Shqipëria të jetë pjesë e BE- së, por sipas Ramës, edhe liderë të tjerë nuk e thonë në publik për shkak se janë çështje politike. “Emannuel Macron më ka përsëritur shpesh se çelja e negociatave me Shqipërinë do të jetë e vështirë për shkak të Marin le Pen. I thashë pse nuk e thua publikisht. Publikisht thonë se shqiptarët kanë probleme dhe opinioni publik e percepton se ne po bëjmë diçka të gabuar dhe se jo Macroni ka probleme me zgjedhjet”, u shpreh Kryeministri. Duke folur për procesin e zgjerimit të BE- së, Rama tha se “e kuptoj që është mjaft e vështirë të marrësh vendime të mëdha, ndërkohë që u vë veshin kritikëve. Nga Adenauer te De Gol nuk do të arrinin dot kurrë të bënin atë që bënë nëse do t’u vinin veshin kritikëve. Prej vitesh nga rrjetet sociale e nga gazetat nuk është besoj burimi ku mund të gjesh forcën për t’u projektuar në të ardhmen. Ne duam të jemi pjesë e BE- së, por më duhet të jem shumë i drejtpërdrejtë, nuk mund të imagjinoj një shtëpi që funksionon mirë ku nipërit e vegjël u vënë veto gjyshërve”, tha Rama. Ai theksoi se kur bullgarët donin të hynin në BE, krejt papritur gazetat po shkruanin se ata do të përpiqeshin t’i vrisnin, dhe po ashtu për rumunët. “Krimi shqiptar? Çfarë nënkupton kjo? Nuk ka një krim shqiptar për arsye shumë të thjeshta. Krimi i organizuar është ndërkombëtar. Nuk kemi parë ndonjë kriminel të arrestuar në Shqipëri të lidhur me botën e jashtme, që nuk kishte të paktën 4 kode numrash në telefon: Gjermani, Holandë, Britani. Pra, këta njerëz e kanë krijuar ‘ Bashkimin e tyre Europian’”, tha Rama.