Kultivimi i kanabisit vijon, vetëm në Krujë 332 procedime penale gjatë këtij viti
Numri i procedimeve të nisura për kultivim kanabisi, thuajse i njëjtë me atë të vitit 2016. Edhe këtë herë para fushatës zgjedhore
Ministria e Brendshme dhe Policia e Shtetit janë përpjekur të minimizojnë fenomenin e kultivimit të kanabisit në vend.
Madje, vetë numri një i dikasterit blu, Sandër Lleshaj ka deklaruar në daljet e tij publike, se ky fenomen është i vdekur. Por duket se shifrat flasin kundër tyre. “News 24” raportoi dje se vetëm në rrethin e Krujës, rezulton të jetë shkatërruar një numër i madh parcelash me kanabis. Kjo provohet nga numri i lartë i procedimeve penale të regjistruara përgjatë 2020- ës nga Prokuroria e Krujës. Në dhjetë muajt e këtij viti, janë regjistruar pranë këtij institucioni 332 procedime penale për “kultivim të lëndëve narkotike”. Në një pjesë të procedimeve, Prokuroria ka emra konkret të personave të dyshuar, të cilët janë përfshirë në veprimtarinë e paligjshme, ndërsa rastet e tjera janë regjistruar çështjet, por ende nuk ka asnjë të dyshuar. Burime të besuara thanë se shifra është e përafërt me vitin 2016, ku numri i çështjeve hetimore që lidheshin me kanabisin, shkonte diku pak më shumë se 400 të tilla. Por asokohe, Shqipëria rezultoi të ishte mbjellë nga Veriu në Jug me kanabis, fenomen që u kthye në shqetësues për partnerët. Por ndryshe nga 4 vite më parë, hetuesit thonë karakteristikë kanë parcelat me sipërfaqe të vogla. Por, përveç shifrave të përafërta të procedimeve për kultivim kanabisi, duket se ka edhe një të përbashkët të madhe mes vitit 2016, kur ishte rekordi dhe këtij viti. Ashtu si atëherë, edhe tani kultivimi i drogës kryhet në një kohë pak para fushatës zgjedhore, që atëherë ishin në vitit 2017, ndërsa zgjedhjet e ardhshme zhvillohen në prill të vitit 2021.