Pensionet, 15 milionë USD për skemën e kompensimit
Zbardhet relacioni i buxhetit për kompensimin e pensionistëve. Si do ndahet fondi 15 milionë për çdo kategori dhe çfarë përfitojnë pensionistët për dritat dhe taksat
Që pas heqjes së fashës për konsum 300 kilovatë në orë, këtu e 6 vite me parë, Qeveria i përfshiu pensionistët në skemën e kompensimit.
Çdo muaj, më shumë se 140 mijë të moshuar, një shifër kjo që ka ardhur në rritje vit pas viti, përfitojnë 648 lekë shtesë mbi pensionin e tyre mujor.
FONDI
Janë rreth 15 milionë dollarë që Qeveria planifikon për të përballuar efektet e kësaj skeme. Kjo është vënë në dukje edhe në projektbuxhetin për vitin e ardhshëm, pavarësisht se nuk është specifikuar masa e fondit që kalon në arkën e ISSH- së për t’u ndarë bashkë me pensionet. “Sistemi do të vazhdojë të mbështesë me të ardhura mesatarisht nga 744- 792 mijë persona që kanë përfituar dhe përfitojnë pensione publike, pensione suplementare si dhe një sërë të ardhura të tjera të parashikuara me ligje si dhe, vendime të veçanta si dhe vendime kompensuese të Këshillit të Ministrave”, thuhet në relacionin që shoqëron draftin. Por, përveç kompensimit prej 648 lekësh në muaj, pensionistët do të vazhdojnë të marrin edhe 500 lekë në muaj në formë kompensimi për dritat dhe ndryshimin e çmimit të bukës. Të favorizuar janë edhe ata të moshuar, të cilët kanë fëmijë, por që nuk janë në marrëdhënie pune, pasi për këtë kategori aplikohet edhe një shtesë tjetër, që është rreth 414 lekë në muaj. Pra, gjithsej janë 914 lekë që të moshuarit do të vazhdojnë të përfitojnë çdo muaj krahas të ardhurave nga pensioni.
Gjithashtu, pensionistët me pensione minimale do të vazhdojnë të përfitojnë nga politikat e kompensimit të pensioneve sipas VKM nr. 401, datë 21.06.2006, kompensim në masën deri në 500 lekë në muaj dhe sipas VKM nr 763, datë 27.12.2006 kompensimin në masën deri 760 lekë në muaj, sipas VKM nr. 415, datë 27.04.2009 “Për rritjen e pensioneve” në masën 190 lekë në muaj dhe sipas VKM nr 477, datë 30.6.2010 “Për rritjen e pensioneve” në masën 200 lekë në muaj. Rreth 1650 lekë është shuma që përfitohet shtesë vetëm nga vendimet e marra ndër vite për kompensimin e energjisë elektrike. Për të përfituar, mjafton veç që pensionisti të mos ketë të ardhura të tjera veç pensionit dhe fatura e dritave të jetë në emër të tij. Në rastin kur janë dy pensionistë, pra, burrë e grua, kompensimin e përfiton vetëm njëri prej tyre. Për të aplikuar duhet të dorëzojnë një fotokopje të kartës së identitetit, certifikatën familjare, si dhe fotokopje të librezës së energjisë elektrike, me anë të së cilës vërtetohet se energjia elektrike paguhet në mënyrë të rregullt.
PËRJASHTIMI NGA TAKSAT
Por, ata pensionistët kryefamiljarë, të cilët nuk kanë të ardhura të tjera veç pensionit janë po ashtu të përjashtuar nga taksa e banesës që ka nisur të aplikohet prej fillimit të këtij viti. Qeveria ka lënë jashtë skemës së taksimit këtë kategori. Taksa e shtëpisë, e cila varion nga 2100 deri në 6500 lekë në vit. Me një llogaritje të thjeshtë, vetëm nga përjashtimet e taksave bashkiake, një pensionist kryefamiljar mund të shmangë nga fatura mujore rreth 900 lekë detyrime. Mjafton që kryefamiljari të jetë pensionist dhe në certifikatën familjarë ose të jetojë i vetëm me bashkëshorten, ( po pensioniste), ose asnjë nga familjarët e tjerë të mos ketë të ardhura.