Prezantohet përbërja e re e kabinetit qeveritar në Serbi
Mandatarja e qeverisë së re në Serbi, Kryeministrja e deritanishme, Ana Bërnabiç, të dielën njoftoi përbërjen e qeverisë së re serbe. Ministër i Punëve të Brendshme në qeverinë e re të Serbisë do të jetë Aleksandar Vullin, ministër i Punëve të Jashtme, Nikolla Sellakoviç ( ish- ministri Ivica Daçiç u bë kryeparlamentar), ministër i Mbrojtjes Nebojsha Stefanoviç, Zorana Mihajloviç do të jetë ministre e Energjisë, ndërsa Sinisha Malli dhe Zllatibor Lonçar do të qëndrojnë në Financa dhe Shëndetësi. Në qeverinë e re është edhe kryetarja e deritanishme e Parlamentit, Maja Gojkoviç, si ministre e Kulturës. Qeveria e re, e udhëhequr nga Kryeministrja Bërnabiç do të ketë 21 ministri. Kabineti do t’i paraqitet Parlamentit më 28 tetor. Nga zgjedhjet në Serbi kanë kaluar 126 ditë. Kjo do të thotë se formimi i kësaj qeverie është më i gjati në 20 vitet e fundit. Zgjedhjet u mbajtën në 21 qershor dhe lista e Partisë Përparimtare Serbe e Presidentit aktual Aleksandar Vuçiç fitoi 188 nga 250 ulëse në Parlament. Koalicioni Partia Socialiste e Serbisë, Serbia e Bashkuar ( Ivica Daçiç) fitoi 32 vende dhe Aleanca Patriotike Serbe SPAS, 11 vende. Partitë e pakicave kombëtare, Aleanca e Hungarezëve të Vojvodinës, Partia e Drejtësisë dhe Pajtimit, SDA Sanxhak dhe Alternativa Demokratike Shqiptare janë gjithashtu ulëse në parlament. Presidenti i Serbisë, Aleksandar Vuçiç ka njoftuar se qeveria e re e Serbisë do të ketë një mandat të kufizuar, deri më 3 prill të vitit 2022, kur do të mbahen zgjedhjet e reja parlamentare, së bashku me zgjedhjet e rregullta presidenciale.