Shkodër, fshati Obot i izoluar, përmbyten mbi 1500 ha tokë
Sipërfaqja totale e përmbytur nga reshjet e shumta të shiut në Shkodër është 1595 hektarë, ndërsa është rritur edhe niveli i ujit në lumin Drin dhe Buna. Autoritetet lokale kanë njoftuar ditën e djeshme se në Njësinë Administrative të Dajçit, Buna është drejt nivelit maksimal. Rruga Obot vazhdon të jetë e bllokuar për mjetet e ulëta dhe e kalueshme vetëm me mjete të larta, pasi niveli i ujit mbi rrugë arrin mbi 80cm. Ujësjellësi “Oblika 1” si pasojë e përmbytjeve është jashtë funksionit. Ndërkohë që ka vazhduar gërryerja e tokës bujqësore nga lumi Drin në vendin e quajtur Harku i Bërdicës, fshati Bërdicë e Sipërme. Sipas njoftimit nga Bashkia Shkodër, është bërë lajmërimi i hershëm që banorët që rrezikohen nga përmbytja të marrin masa për sigurimin e gjësë së gjallë, prodhimeve bujqësore, mjeteve dhe pajisjeve të ndryshme që mund të dëmtohen. Hidrometri në Dajç ditën e djeshme shënonte kuotën 6.28 m (kuota max 6.30 m). Hidrometri i Liqenit të Shkodrës shënonte 8.45 m (kuota max 8.70 m). Hidrometri i lumit Drin shënonte kuotën 6.95 m (kuota max 7.50 m). Shumë zona të Nën Shkodrës prej ditësh janë të mbuluara nga uji. Kryetarja e Bashkisë Shkodër, Voltana Ademi, ka treguar për situatën e vështirë të krijuar nga përmbytjet dhe masat që janë marrë nga ana e bashkisë në rast të nevojës për evakuim, duke thënë se janë qindra shtretër të gatshëm. Ajo që mbetet më shqetësuese për momentin, sipas kryebashkiakes, është furnizimi me ujë të pijshëm për banorët e fshatit Obot në Anën e Malit, të cilët janë të izoluar për shkak të prezencës së ujit në rrugën kryesore të fshatit, që nuk lejon kalimin e mjeteve të ulëta.