Helmohen rreth 30 persona në Bulqizë
Shkak dyshohet uji në zonë, gjendja e tyre është e mirë
BULQIZË- Rreth 30 persona dyshohet të jenë helmuar ditën e djeshme në Shupenzë, Bulqizë. Sipas “News24”, ata janë paraqitur për të marrë shërbim mjekësor pranë Qendrës Shëndetësore në Shupenzë. Fillimisht kanë qenë tre pjesëtarë të një familjeje që janë helmuar dhe dyshohet nga uji i pijshëm në zonë, pas dëmtimit të tubacionit dhe përzierjes me ujërat e zeza. Të gjithë banorët që kanë shfaqur probleme shëndetësore kanë marrë serum në Qendrën Shëndetësore të Shupenzës, ndërkohë që kanë shkuar edhe persona të tjerë nga gjithë zona, nga Gjorica,
Hoshaten, Shupenza. Mjekët kanë deklaruar se nuk e dinë nga ka ardhur helmimi dhe se pacientët janë paraqitur nga zona të ndryshme. Ndërkohë, për këtë ngjarje ka reaguar edhe administratori i Ujësjellësit Bulqizë, Asllan
Daxha, i cili mohoi të bëhej fjalë për helmim nga uji i pijshëm. Ai deklaroi se në Njësinë Administrative Shupenzë nuk ka kanalizime të ujërave të zeza, pasi janë me puseta personale dhe se burimet e ujit të pijshëm janë të sigurta dhe monitorohen gjatë gjithë kohës. “Nuk ka kanalizime të ujërave të zeza në Njësinë Administrative Shupenzë. Ka një linjë ujësjellësi që është e monitoruar. Jam 100% i bindur se nuk ka ardhur nga uji, sepse dy vendburimet e ujit janë të sigurta, të rrethuara dhe monitoruara me roje dhe të klorifikuara. Mendoj se është virozë, sepse paraqitja e personave të ndryshëm në grupe nga 3 apo 5. Gjithsesi ne jemi në kontakt me drejtoreshën e Qendrës Shëndetësore”, ka thënë ai. Nga ana tjetër, banorët kanë pretenduar se helmimi ka ardhur nga uji i pijshëm.