Çekiçi fenomenal, Manaj gol dhe asist
Endri Çekiçi kishte qenë protagonist me asiste në Turqi, me bluzën e Angaraguçusë, por goli i tij i parë nuk mund të ishte më spektakolar sesa ai i djeshmi. Në duelin kundër Bashaksehirit, i fituar nga këta të fundit me rezultatin 2-1 në transfertë, fantazisti shqiptar ishte protagonist i një perle me goditje dënimi. Në minutën e 20-të, teksa ekipi i tij ishte në dizavantazh 1-0, Çekiçi thuajse nga pozicioni i një goditjeje këndi më të shkurtër, nxjerr nga repertori i tij një të djathtë drithëruese, e cila përfundon në trekëndëshin e shtyllës së dytë të portierit rival, duke vendosur përkohësisht baraspeshën e takimit. Për pogradecarin ky ishte goli i parë në kampionatin turk me Ankaraguçusë, por në fund ai nuk shërbeu për të marrë qoftë edhe një pikë. Madje, në minutën e 56-të kur Bashaksehir realizoi edhe golin e avantazhit me
DembaBa, trajneri i Ankaraguçusë në mënyrë të pakuptueshme thirri në stol shqiptarin, duke i dhënë hapësirë Çetin. Gjithsesi, edhe pse goli i Çekiçit nuk i shërbeu për marrjen e një rezultati pozitiv, në fund futbollisti kuqezi u vlerësua nga uebsajti me notën 7.8, pasi në 56 minutat e luajtura ai dërgoi 2 nga 3 goditjet e tentuara në kuadrat, si dhe fitoi 2 nga pesë duelet kokë më kokë.
Super-Manaj - Jo vetëm Çekiçi, por edhe sulmuesi i Shqipërisë Rei Manaj, ka spikatur në fitoren e skuadrës së tij, Barcelona B, 4-0 ndaj Badalonas në takimin e javës së 11-të të grupit 3 në Segunda Division. 23-vjeçari realizoi golin e tretë me penallti, por përpara tij kishte asistuar shokun e ekipit për golin e dytë të takimit. Manaj shmangu njërin prej mbrojtësve kundërshtarë brenda zonës dhe nxori në pozicion të favorshëm shokun e ekipit Aleks Kolados në minutën e 68-të. 19 minuta më vonë, ishte vetë Manaj që shkundi rrjetën në këtë sfidë duke kthyer në gol penalltinë e fituar.
Ky është goli i tretë i sulmuesit kuqezi në këtë sezon me Barcelonën B dhe një kartolinë e rëndësishme e radhës, për të bërë një hap të radhës të madh në karrierë, në Spanjë apo kudo tjetër.