Mitsotakis, drekë private me Ramën në shtëpinë e tij
Autoritetet greke, duke filluar që nga Kryeministri Mitsotakis por edhe ministri i Jashtëm Dendias, e trajtuan në aspektin privat vizitën në Athinë të kreut të qeverisë shqiptare, Edi Ramës. Kryeministri grek, Kyriakos Mitsotakis, shtroi një drekë në shtëpinë e tij për Ramën, në prani të ministrit të Jashtëm Dendias dhe këshilltares së tij diplomatike, Eleni Sourani, ish-ambasadore e Greqisë në Tiranë. Por edhe takimi me ministrin e Jashtëm Dendias, i cili zgjati përtej çdo parashikimi, nuk u pasqyrua si aktivitet zyrtar i ministrit në faqen zyrtare të kësaj Ministrie. Kryeministri Rama ka vlerësuar pritjen e ngrohtë që i është bërë nga homologu i tij Kyriakos Mitsotakis, e cila i ka lënë një shije të mirë, pa specifikuar nëse ishin gatimet apo temat e diskutuara. Në një postim në rrjetet sociale, Rama shprehet se mes tij dhe Mitsotakisit është diskutuar për situatën e krijuar nga koronavirusi, marrëdhëniet mes dy vendeve dhe vullnetin e plotë për ta zhvilluar bashkërisht më tej këtë raport. "Falënderues për shijen e shkëlqyer të mikpritjes në shtëpinë e Kryeministrit Mitsotakis, ku bëmë një bilanc të situatës me COVID-in, marrëdhënies mes dy vendeve tona dhe problematikave rajonale! Vullnet i plotë për ta zhvilluar bashkërisht më tej këtë marrëdhënie strategjike", shkruan Rama. Ministri i Jashtëm i Greqisë, Nikos Dendias, ka reaguar lidhur me takimin e zhvilluar me Kryeministrin e Shqipërisë, Edi Ramën. Sipas Dendias, ne fokus të bisedimeve me Kryeministrin Edi Rama kanë qenë marrëdhëniet bilaterale, perspektiva e Shqipërisë për në Bashkimin Europian dhe zhvillimet e fundit rajonale.