“Deti” pas zgjedhjeve, ministri grek zbardh negociatat me Ramën
Dendias tregon bisedën me Ramën dhe kur do t’i drejtohen Gjykatës për marrëveshjen e kufirit detar
Një nga çështjet më të debatuara së fundmi, ajo për zgjidhjen e kufirit detar me Greqinë, është dakordësuar të bëhet menjëherë pas zgjedhjeve të 25 prillit.
Ky fakt tregon se midis dy qeverive është arritur një marrëveshje, por ajo po mbahet e fshehtë, me qëllim që të mos ndikojë në rezultatet e zgjedhjeve parlamentare në Shqipëri.
Ministri i Jashtëm i Greqisë, Nikos Dendias, ka dhënë dje një intervistë në gazetën “Kathimerini”, ku mes të tjerash, ka përcaktuar rolin që aspiron të ketë Greqia në rajonin ballkanik, si dhe është referuar gjatë në takimin me Kryeministrin shqiptar, Edi Ramën, në kuadrin e zhvillimeve të shpejta të javëve të fundit për trajtimin e çështjeve të axhendës së përbashkët. Dendias ka theksuar se “Greqia luan një rol shumë të rëndësishëm në konsolidimin e stabilitetit dhe paqes, si përmes mbështetjes së vazhdueshme të perspektivës europiane, ashtu edhe përmes pjesëmarrjes aktive dhe kontributit në nismat rajonale. Objektivi ynë është integrimi i vendeve të Ballkanit Perëndimor në familjen europiane. Në të njëjtën kohë mbrojtja nga depërtimi i rrjeteve ekstremiste dhe perceptimet neo-otomane. Në këtë aspekt kontribuojnë dhe vendet myslimane të rajonit e më gjerë, që janë pro pozicionimeve tona, me të cilat ne ndërtojmë një marrëdhënie të qëndrueshme dhe të sinqertë, me aspiratën të jemi ura e bashkëpunimit me vendet me një popullsi të krishterë. Për të arritur të gjitha këto kemi një prezencë tepër aktive”.I pyetur nga gazetari Vasilis Nedhos për projektligjin e depozituar në Parlamentin grek për zgjerimin e ujërave territoriale me 12 milje, Dendias ka theksuar se “projektligji do të votohet menjëherë. Duhet të mos e nënvleftësojmë rëndësinë që ka. Ky zgjerim i kufijve sovranë të shtetit grek, i pari nga 1947-ta, në mënyrë paqësore dhe bazuar në të drejtën ndërkombëtare, është e drejtë e panegociueshme e vendit tonë. Por që të jem i qartë, ne po përgatitemi për zgjerim edhe në zona të tjera të vendit. Po hedhim hapat e duhur teknikë, që të jemi gati kur të konsiderohet koha e duhur të veprojmë. Kur do të ndodhë kjo, mbetet një vendim politik”. Ministri grek është referuar me detaje dhe në axhendën e diskutimit me Kryeministrin shqiptar, Edi Ramën, të premten, më 8 janar, në Athinë. “Me Kryeministrin shqiptar kemi një marrëdhënie bashkëpunimi të sinqertë tashmë. Unë pata mundësinë të bisedoja gjerësisht me të për të gjitha çështjet bilaterale dhe rajonale, si gjatë vizitës sime në Tiranë dhe gjatë vizitës së tij në Athinë. Për çështjen e rekursit në Hagë, ekipet përkatëse teknike po vazhdojnë punën e tyre. Qëllimi është që premtimi i përbashkët të nënshkruhet dhe të paraqitet sa më shpejt që të jetë e mundur, mendoj pas zgjedhjeve parlamentare në Shqipëri në prill. Shënoj se të gjitha forcat politike shqiptare janë dakord se çështja e përcaktimit të zonave detare midis dy vendeve duhet të zgjidhet në bazë të së Drejtës Ndërkombëtare të Detit nga Gjykata Ndërkombëtare e Drejtësisë në Hagë. Kjo është pikërisht ajo që po u themi bashkëbiseduesve tanë turq. Dhe është veçanërisht e dobishme të kujtojmë se z. Rama pranon që Greqia ka të drejtën e panegociueshme, të njëanshme për të zgjatur ujërat e saj territoriale në 12 milje. Ai shtoi, në fakt, se Shqipëria kishte bërë të njëjtën gjë 30 vjet më parë. Dhe kështu që asnjë vend i tretë nuk mund ta kundërshtojë këtë të drejtë, ose akoma më tepër, të kërcënojë me luftë për këtë arsye”, është shprehur diplomati grek.
“Me Kryeministrin shqiptar kemi një marrëdhënie bashkëpunimi të sinqertë tashmë. Unë pata mundësinë të bisedoja gjerësisht me të për të gjitha çështjet bilaterale dhe rajonale, si gjatë vizitës sime në Tiranë dhe gjatë vizitës së tij në Athinë. Për çështjen e rekursit në Hagë, ekipet përkatëse teknike po vazhdojnë punën e tyre