Rrëfimi i mjekut: Pse ia ndaluam udhëtimet Enverit pas vitit 1978
Profesor Ahmet Kamberi: Gati i tërë ekipi do ta shoqëronte në atë udhëtim, i cili do të ishte i pari katër vjet pas infarktit
Profesor Ahmet Kamberi, mjeku i Enver Hoxhës, tregon në librin e tij "Pacienti ynë i veçantë" edhe për përjetimet emocionale të Enver Hoxhës pas vizitave jashtë Tiranës. Sipas profesor Kamberit, vizitat në Jug, në Gjirokastër dhe Sarandë, në 1978 të kërkuara nga vetë Enver Hoxha ishin të fundit jashtë kryeqytetit, pasi përparimi i sëmundjeve kardiovaskulare dhe diabetit nuk ia lejonin atij lëvizjet e gjata. Gjatë vizitës në Gjirokastër, Enver Hoxha ka zhvilluar takime të shumta, duke u ngjitur dhe në Qafën e Pazarit, por dhe në fshatrat përreth, gjë që i shqetësonte shumë mjekët e ekipit, të cilët kishin shkuar të gjithë bashkë pranë Enver Hoxhës. Por, ajo që i shqetësonte më shumë mjekët, ishte përjetimi i momente prekëse dhe emocionuese, që lidheshin me fëmijërinë e tij apo me vitet kur kishte punuar si profesor i liceut të Korçës. Në Korçë Enver Hoxha ishte në mesin e korrikut të 1978, ku përveç vapës edhe emocionet e rënduan në funksionimin e zemrës. Profesor Kamberi është thirrur natën në korrik 1978, kur Enveri ishte kthyer nga Korça në Pogradec, pasi kishte shfaqur aritmi për shkak të përjetimeve emocionale. "Më 17 gusht u thirra natën. I kishte dalë gjumi nga palpitacionet e zemrës. Pa filluar ta vizitoja, më pyeti se si i kisha kaluar pushimet dhe nëse ishin kënaqur fëmijët. Meqenëse aritmia nuk po zotërohej me mjekimin që i kisha filluar, më 21 gusht e vizituam në mëngjes së bashku me Hoxhën dhe Yllin. Aritmia ishte e pranishme, por nuk e shqetësonte", shkruan profesor Kamberi në librin e tij.