“Vendi përmbytet, qeveria në restorantet e luksit në Dubai”
Basha, akuza qeverisë: Ka braktisur të përmbyturit. S’ka arsye që të mos ju ndihmojë me ujë e medikamente
Kryetari i Partisë Demokratike, Lulzim Basha, ka reaguar sërish në lidhje me videon ku shfaqeshin disa ministra dhe zyrtarë të kabinetit qeveritar Rama në një darkë në Dubai, në restorantin luksoz të Nusretit.
Nëpërmjet një video-montazhi të publikuar në faqen e tij në “Facebook”, kryedemokrati Basha denoncon jetën e luksit të kësaj qeverie dhe mungesën e reagimit në këto ditë të vështira që po kalon vendi. Në video thuhet se Rama dhe qeveria e tij e ka hallin te verërat e shtrenjta dhe rakia dhe se ata kujdesen për qejfet e tyre dhe jo për qytetarët. Në kohën kur qeveria duhet të ishte pranë qytetarëve të saj për t’u shërbyer, ata zgjedhin të jenë në një nga restorantet më të shtrenjta të Dubait, ku vetëm një biftek kushton njëqindmijë lekë të reja. Ky është një turp i madh për qeverinë pasi njerëzit po përballen me disa fatkeqësi njëkohësisht, të cilat i kanë varfëruar. Videon kreu i PD-së e shoqëron edhe me një mesazh ku shkruan se: “Ndërkohë që vendi është nën ujë, mijëra familje po kalojnë dimrin e dytë në çadra, shqiptarët janë pa asnjë ndihmë përballë krizës ekonomike dhe shëndetësore, ministrat e Ramës shtrohen për shtatë palë qejfe në restorantin më të shtrenjtë në Dubai. Është koha të kemi një qeveri që kujdeset për njerëzit dhe jo këtë që e ka mendjen vetëm për veten e saj”. Më herët, nga Sukthi ku vizitoi zonat e përmbytura, Basha i kërkuar edhe një herë qeverisë të ndalojë propagandën, por të ofrojë ndihmë për banorët e zonave që gjenden nën ujë. Gjatë takimit me banorët, Kreu i PD-së u shpreh se kjo ndodh për shkak se Rama dhe qeveria e tij e kanë mendjen vetëm te qejfet e tyre dhe jo t’u shërbejnë qytetarëve. “Sot janë pakësuar reshjet, duhet urgjentisht të merren masat, problemi është që mungesa e investimeve ka sjellë këtë gjendje. Qeveria duhet të mendojë për ju, jo për veten. Nuk ka asnjë arsye që të mos ju vijnë në ndihmë, për ujë të pijshëm, për medikamente, për ndihmë ushqimore, kjo është një zonë e varfër, zonë që përmbytet sa herë që bie shi”, tha Basha. Gjatë bisedës, një banor i tha se “kemi mbi 10 ditë pa ujë. Askush s’ka marrë masa për ne. Premtime na kanë dhënë, asgjë s’kanë bërë. Prishet tubi i ujit, shkojmë e rregullojmë vetë. Situata më keq s’ka ku shkon, kemi gati një javë e më shumë me këtë gjendje. Sot përmbytet gjithë kjo zonë, për një turbinë që duhej vënë. Për një diçka shumë të thjeshtë, një investim shumë i thjeshtë, përmbytet e gjithë zona. Zoti na ndihmoftë, se për dorën e shtetit ne jemi të vdekur”. Nga ana e tij, kreu i opozitës u tha banorëve se arsyeja që ata përmbyten sa herë që bie shi, janë investimet e munguara të qeverisë dhe pushtetit lokal në këto tetë vite qeverisjeje nga rilindja.