Darka në Dubai, Vasili tregon prapaskenat se çfarë fshihet dhe i bën thirrje SPAK të hetojë
Nënkryetari i LSI-së, Petrit Vasili, denoncoi dje përmes një deklarate për mediat se përtej darkës së shtrenjtë të ministrave të Shqipërisë në Dubai fshihet diçka më e rëndë, të cilën e konsideron si skandalin më të rëndë të një shekulli. Sipas Vasilit, në atë tavolinë janë bërë pazaret e një marrëveshjeje ku anashkalohen të gjitha ligjet e konkurrencës së ndershme në fushën e turizmit, bujqësisë dhe infrastrukturës në Jug të vendit. “Është rënë dakord që sipas marrëveshjes që kanë nënshkruar të dyja palët, të gjitha projektet, kontratat dhe gjithë çka lidhje me këtë marrëveshje nuk do t’i nënshtrohen asnjëherë prokurimit publik, tenderit publik, procedurës konkurruese publike apo ndonjë procedure tjetër të përcaktuar në legjislacionin kombëtar të Republikës së Shqipërisë. Dhe konkretisht në tavolinën e darkës ka edhe një menu tjetër. Kjo është edhe menuja e vërtetë, që të dini se çfarë shqyen në atë darkë. Në atë darkë ishin 3 projekte, pikërisht pjesë e kësaj marrëveshjeje: rizhvillimi i Portit të Durrësit; mundësitë e investimeve në industrinë e turizmit, bujqësisë dhe logjistikës së Vlorës, Sarandës, Ksamilit dhe e treta, investimet në fushën e turizmit në zonën e Përmetit. Pra të gjithë këto zona me një potencial të jashtëzakonshëm turistik, me mundësi të jashtëzakonshme, që nëpërmjet garës së hapur, konkurrimit të ndershëm, themelit të një shoqërie demokratike, por që bën biznes të ndershëm, janë tashmë objekt ndarjeje e shitjeje, pa asnjë konkurrim e asgjë, dhurata reciproke që Shqipëria i bën kujt i intereson”, tha Vasili.